བསྐལ་པ་བཟང་པོ།

The Good Eon
F.284.a

Bhadra­kalpika
F.284.a, volume 45, Degé Kangyur

འདུས་པ་ལན་གྲངས་ཉི་ཤུ་དྲུག་ཀུན་ལའང་། །​རི་ཡི་རྒྱལ་པོ་ལྟ་བུར་མི་གཡོ་བ། །​བྱེ་བ་ཕྲག་ནི་ཉི་ཤུ་གསུམ་གསུམ་ཡོད། །​མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །​ཡོངས་སུ་མྱ་ངན་འདས་ནས་དམ་ཆོས་དག །​ལོ་གྲངས་ཉི་ཁྲི་ཉིས་སྟོང་བར་དུ་གནས། །​རྒྱལ་བའི་སྐུ་གདུང་དག་ནི་རྒྱས་འགྱུར་ལ། །​མཆོད་རྟེན་བྱེ་བ་སྟོང་ཕྲག་བརྒྱད་ཅུ་བྱུང་། །​སངས་རྒྱས་སྤོབས་པ་མཚུངས་མེད་རྒྱལ་པོ་ཡི། །​སྐྱེ་བའི་ཡུལ་ནི་སྣ་ཚོགས་མཛེས་ཞེས་བྱ། །​རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །​དཔག་ཚད་བཞི་བཅུ་ཡབ་ནི་སྐྱོན་མེད་ཡིན། །​ཡོན་ཏན་མཐོང་ཞེས་བྱ་བ་རྒྱལ་བའི་ཡུམ། །​ཡོན་ཏན་ཅན་སྲས་བློ་ལྡན་རིམ་གྲོ་པ། །​རྒྱལ་མཚན་མཆོག་ཅེས་བྱ་བ་མཁས་པ་སྟེ། །​ནོར་ལྷའི་བུ་ཏོག་ཅེས་བྱ་རྫུ་འཕྲུལ་ཅན། །​འདུས་པ་ལན་གྲངས་དགུ་བཅུ་ཀུན་ལ་ཡང་། །​ཆུ་དང་ནམ་མཁའ་ལྟ་བུར་གསལ་བ་པོ། །​བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །​མི་ཚེ་ལོ་གྲངས་དགུ་ཁྲི་ཉིས་སྟོང་ཡིན། །​ཡོངས་སུ་མྱ་ངན་འདས་ནས་དམ་ཆོས་དག །​ལོ་གྲངས་དགུ་ཁྲི་ཆིག་སྟོང་བར་དུ་གནས། །​འགྲོ་ལ་ཕན་ཕྱིར་རྒྱལ་བའི་སྐུ་གདུང་དག །​རྒྱས་པར་འགྱུར་ཏེ་ཞིང་རྣམས་གང་བར་འགྱུར། །​སངས་རྒྱས་ཡེ་ཤེས་རྣམ་འབྱེད་ང་རོ་ཡི། །སྐྱེ་བའི་ཡུལ་ནི་རྣམ་གྲགས་ལྷ་ཞེས་བྱ། །​རིགས་ནི་བྲམ་ཟེ་ཡིན་ཏེ་འོད་དཔག་ཚད། །​ཉི་ཤུ་རྩ་གཉིས་ཡབ་ནི་ངོས་བཟངས་ཡིན། །​མཚན་ལྡན་མ་ཞེས་བྱ་བ་རྒྱལ་བའི་ཡུམ། །​བསོད་ནམས་འདོད་སྲས་གཙོ་བོ་རིམ་གྲོ་པ། །​བརྟུལ་ཞུགས་གྲུབ་ཅེས་བྱ་བ་མཁས་པ་སྟེ། །​ཆགས་པ་མེད་པར་གནས་པ་རྫུ་འཕྲུལ་ཅན། །​འདུས་པ་ལན་གྲངས་སུམ་ཅུ་གསུམ་ཀུན་ལའང་། །​དྲི་བྲལ་འཇིག་རྟེན་དྲི་མའི་དྲི་མེད་པ། །​བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །​མི་ཚེ་ལོ་གྲངས་སུམ་ཁྲི་བཞི་སྟོང་ཡིན། །​ཡོངས་སུ་མྱ་ངན་འདས་ནས་དམ་ཆོས་དག །​ལོ་གྲངས་སུམ་ཁྲི་ཆིག་སྟོང་བར་དུ་གནས། །​རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །​དྲུག་ཅུ་པ་གཅིག་གསེར་གྱི་བླ་རེར་ལྡན། །​དེ་བཞིན་གཤེགས་པ་སེང་གེའི་མཆེ་བ་ཡི། །​སྐྱེ་བའི་ཡུལ་ནི་བྲོ་བའི་མཆོག་ཅེས་བྱ། །​རིགས་ནི་རྒྱལ་རིགས་ཡིན་ཏེ་འོད་དཔག་ཚད། །​བྱེ་བ་ཕྲག་གསུམ་གླང་ཆེན་དབང་པོ་ཡབ། །​ཐར་པའི་

eKangyur, UT4CZ5369-I1KG9171-0000, page 567 (284a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14421#UT22084-045-001-14421