བསྐལ་པ་བཟང་པོ།

The Good Eon
F.210.a

Bhadra­kalpika
F.210.a, volume 45, Degé Kangyur

གཤེགས་པ་ཆགས་པ་མེད་མཛད་ཀྱི། །​སྐྱེ་བའི་ཡུལ་ནི་བསོད་ནམས་བསགས་ཞེས་བྱ། །​རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །​དཔག་ཚད་བདུན་ཅུ་ཡབ་ནི་ཆགས་མེད་ཡིན། །​ལྷ་བདག་མ་ཞེས་བྱ་བ་རྒྱལ་བའི་ཡུམ། །​སྲས་པོ་བདེན་སྦྱིན་ལྷ་ཆེན་རིམ་གྲོ་པ། །​མཛོད་ཆེན་འཆང་བ་བློ་གྲོས་ཅན་ཡིན་ཏེ། །​རྣམ་པར་ངེས་པའི་ལྷ་ནི་རྫུ་འཕྲུལ་ཅན། །​འདུས་པ་ལན་གྲངས་དྲུག་ཅུ་ཀུན་ལ་ཡང་། །​དངོས་པོར་འཛིན་དང་བྲལ་བའི་བསམ་གཏན་པ། །​བྱེ་བ་ཕྲག་ནི་བཅུ་གཅིག་བཅུ་གཅིག་ཡོད། །​མི་ཚེ་ལོ་གྲངས་དག་ནི་བདུན་ཁྲི་ཡིན། །སྟོན་པ་མྱ་ངན་འདས་ནས་དམ་ཆོས་དག །​ལོ་གྲངས་དགུ་ཁྲི་ཉིས་སྟོང་བར་དུ་གནས། །​རྒྱལ་བའི་སྐུ་གདུང་རྒྱས་འགྱུར་མཆོད་རྟེན་གྲངས། །​བྱེ་བ་ཕྲག་ནི་སྟོང་ཕྲག་བརྒྱད་ཅུ་འབྱུང་། །​དེ་བཞིན་གཤེགས་པ་གཙོ་བོས་བྱིན་སྐྱེ་བའི། །​ཡུལ་ནི་སྐྱེ་བོའི་མཆོད་རྟེན་ཞེས་ཀྱང་བྱ། །​རིགས་ནི་བྲམ་ཟེ་ཡིན་ཏེ་འོད་དཔག་ཚད། །​ཉི་ཤུ་རྩ་གཉིས་ཡབ་ནི་གཙོ་བཟངས་ཡིན། །​གཙོ་མཆོག་མ་ཞེས་བྱ་བ་རྒྱལ་བའི་ཡུམ། །​སྲས་པོ་གཙོ་སྲེད་གཙོ་བོ་རིམ་གྲོ་པ། །​གཙོས་བྱིན་ཞེས་ནི་བྱ་བ་མཁས་པ་སྟེ། །​འཇིགས་པ་མེད་པའི་ཡེ་ཤེས་རྫུ་འཕྲུལ་ཅན། །​འདུས་པ་ལན་གྲངས་སུམ་ཅུ་དྲུག་ཀུན་ལའང་། །​རྒྱགས་དང་ང་རྒྱལ་བྲལ་བའི་བསམ་གཏན་པ། །​བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །​མི་ཚེ་ལོ་གྲངས་དག་ནི་ལྔ་ཁྲི་ཡིན། །​སྟོན་པ་མྱ་ངན་འདས་ནས་དམ་ཆོས་དག །​ལོ་གྲངས་བདུན་ཁྲིའི་བར་དུ་གནས་པར་འགྱུར། །​རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །​དཔག་ཚད་བདུན་པ་གསེར་གྱིས་རྣམ་པར་སྤྲས། །​དེ་བཞིན་གཤེགས་པ་གཙོ་བོ་སྐྱེ་བ་ཡི། །​ཡུལ་ནི་མཆོད་པ་མཆོག་དང་ལྡན་ཞེས་བྱ། །​རིགས་ནི་རྒྱལ་རིགས་ཡིན་ཏེ་འོད་དཔག་ཚད། །​ཉི་ཤུ་གཉིས་ཡོད་ཡབ་ནི་མཆོག་ལེགས་ཡིན། །བསོད་ནམས་རིན་ཆེན་མ་ནི་རྒྱལ་བའི་ཡུམ། །​སྲས་པོ་སྐར་ལྡན་སྐར་བཟངས་རིམ་གྲོ་པ། །​བསོད་ནམས་འདོད་ཅེས་བྱ་བ་མཁས་པ་སྟེ། །​བདེན་པ་རྣམ་པར་ལྟ་བ་རྫུ་འཕྲུལ་ཅན། །​འདུས་པ་ལན་གྲངས་དྲུག་ཅུ་དྲུག་ཀུན་ལའང་། །​བདུད་དང་ཉོན་མོངས་ལྟ་བ་རབ་འཇོམས་པ། །

eKangyur, UT4CZ5369-I1KG9171-0000, page 419 (210a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14273#UT22084-045-001-14273