བསྐལ་པ་བཟང་པོ།

The Good Eon
F.209.b

Bhadra­kalpika
F.209.b, volume 45, Degé Kangyur

རྩལ་ཅན་ནི་མཁས་པ་སྟེ། །​འཕགས་པ་བསྡུས་ཞེས་བྱ་བ་རྫུ་འཕྲུལ་ཅན། །​འདུས་པ་ལན་གྲངས་དྲུག་ཅུ་གཉིས་ཀུན་ལའང་། །​དགྲ་བཅོམ་ཡིད་ནི་ཡོངས་སུ་དག་པ་པོ། །​དེ་དག་བྱེ་བ་ཕྲག་ནི་སྟོང་སྟོང་ཡོད། །​མི་ཚེ་ལོ་གྲངས་དག་ནི་དྲུག་ཁྲི་ཡིན། །​རྒྱལ་བ་ཡོངས་སུ་མྱ་ངན་འདས་ནས་ཀྱང་། །​དམ་ཆོས་ལོ་གྲངས་སྟོང་དུ་གནས་པར་འགྱུར། །​རྒྱལ་བའི་སྐུ་གདུང་དག་ནི་རྒྱས་འགྱུར་ལ། །​ནོར་བུ་མེ་ཤེལ་བརྒྱ་ཡི་དྲ་བས་སྤྲས། །​སངས་རྒྱས་ཤེས་རབ་བྱིན་ནི་སྐྱེ་བ་ཡི། །​ཡུལ་ནི་རྨད་དུ་བྱུང་བའི་འོད་ཅེས་བྱ། །​རིགས་ནི་རྒྱལ་རིགས་ཡིན་ཏེ་འོད་དཔག་ཚད། །​ཉི་ཤུ་རྩ་གཉིས་ཤེས་རབ་ཆེན་པོ་ཡབ། །​ཤེས་རབ་མཆོག་མ་རྒྱལ་ཡུམ་ཤེས་རབ་བྱིན། །​སྲས་ཡིན་ཤེས་རབ་བཟང་པོ་རིམ་གྲོ་པ། །​ཤེས་རབ་ཆེན་པོ་བློ་གྲོས་ཅན་ཡིན་ཏེ། །​འཇིགས་པ་མེད་པའི་ཤེས་རབ་རྫུ་འཕྲུལ་ཅན། །​འདུས་པ་ལན་གྲངས་བརྒྱད་ཅུ་ཀུན་ལ་ཡང་། །​རྒྱལ་བའི་རྒྱལ་པོ་ཡི་ནི་ཚོགས་མཆོག་རྣམས། །​བྱེ་བ་ཕྲག་ནི་ཁྲི་ཕྲག་བཅུ་བཅུ་ཡོད། །​མི་ཚེ་ལོ་གྲངས་བྱེ་བ་བདུན་ཅུ་དྲུག །​བདུད་དང་ཉོན་མོངས་ཐམས་ཅད་འཇོམས་མཛད་པའི། །​དམ་ཆོས་ལོ་གྲངས་བརྒྱད་ཁྲིའི་བར་དུ་གནས། །​རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་འབུམ་ཕྲག་སྙེད་ཀྱི་འཁོར་དང་ལྡན། །​དེ་བཞིན་གཤེགས་པ་འཇམ་པའི་དབྱངས་སྐྱེ་བའི། །​ཡུལ་ནི་ཡིད་དུ་འོང་བའི་དབྱངས་ཞེས་བྱ། །​རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །​དཔག་ཚད་བདུན་སྟོང་ཡབ་ནི་ཡིད་འཐད་ཡིན། །​དབྱངས་མཆོག་མ་ཞེས་བྱ་བ་རྒྱལ་བའི་ཡུམ། །​སྲས་པོ་དབྱངས་སྲེད་དགའ་བོ་རིམ་གྲོ་པ། །​དུལ་བར་གནས་པའི་དབྱངས་ནི་མཁས་པ་སྟེ། །​མཆོག་གི་དབྱངས་ཞེས་བྱ་བ་རྫུ་འཕྲུལ་ཅན། །​འདུས་པ་ལན་གྲངས་བཅུ་སྟེ་ཀུན་ལ་ཡང་། །​ཕ་རོལ་ཕྱིན་ལ་ཤིན་ཏུ་ངེས་ཐོབ་པ། །​བྱེ་བ་ཕྲག་ནི་ཉི་ཤུ་གསུམ་གསུམ་ཡོད། །​མི་ཚེ་ལོ་གྲངས་བདུན་ཁྲི་དྲུག་སྟོང་ཡིན། །​འཇིག་རྟེན་མཁྱེན་པའི་དམ་པའི་ཆོས་དག་ཀྱང་། །​ལོ་གྲངས་སྟོང་གི་བར་དུ་གནས་པར་འགྱུར། །​འཇིག་རྟེན་མཁྱེན་པ་མྱ་ངན་འདས་པ་ཡི། །​སྐུ་གདུང་མཆོད་རྟེན་དཔག་ཚད་བརྒྱད་པ་གཅིག །​དེ་བཞིན་

eKangyur, UT4CZ5369-I1KG9171-0000, page 418 (209b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14272#UT22084-045-001-14272