The Perfection of Wisdom in One Hundred Thousand Lines
F.131.b

འཇིག་རྟེན་གྱི་ཁམས་ཚད་མྱེད་པ་གྲངས་མྱེད་པ་དག་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚད་མྱེད་གྲངས་མྱེད་པ་བཞུགས་ཤིང་། འཚོ་སྐྱོང་བ་དང་། ཆོས་སྟོན་པའི་སངས་རྒྱས་བཅོམ་ལྡན་འདས་སྤྲོས་པའི་ཚུལ་ཆད་པར་གྱུར་པ། ཚིག་གི་ལམ་ཉམས་པ་མྱི་མངའ་བ། ཁུར་བོར་བ། གྲོང་གི་ཚེར་མ་རབ་ཏུ་བསྩལ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཆད་པ། ཡང་དག་པར་ཡོངས་སུ་མཁྱེན་པས། ཐུགས་ཤིན་ཏུ་རྣམ་པར་གྲོལ་བའི་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དེ་དག་གི་བསོད་ནམས་མངོན་པར་འདུ་མཛད་པ་དང་། དེ་དག་ཏུ་རྒྱལ་རིགས་ཆེ་ཞིང་མཐོ་བའམ། བྲམ་ཟེའི་རིགས་ཆེ་ཞིང་མཐོ་བ་འམ། ཁྱིམ་བདག་གི་རིགས་ཆེ་ཞིང་མཐོ་བ་འམ། རྒྱལ་ཆེན་བཞིའི་རིས་ཀྱི་ལྷ་འམ། སུམ་ཅུ་རྩ་གསུམ་གྱི་ལྷ་འམ། མཚེ་མའམ། དགའ་ལྡན་ནམ། འཕྲུལ་དགའ་འམ། གཞན་འཕྲུལ་དབང་བྱེད་དམ། ཚངས་རིས་སམ། ཚངས་ལྷ་ཉེ་ཕན་ནམ། ཚངས་པ་ཀུན་འཁོར་རམ། ཚངས་ཆེན་ནམ། སྣང་བའམ། ཆུང་སྣང་ངམ། ཚད་མྱེད་སྣང་བའམ། ཀུན་སྣང་དང་བ་འམ། དགེ་བའམ། ཆུང་དགེ་འམ། ཚད་མྱེད་དགེ་བའམ། དགེ་རྒྱས་སམ། ཆེ་བ་འམ། ཆུང་ཆེ་འམ། ཚད་མྱེད་ཆེ་བ་འམ། འབྲས་བུ་ཆེ་བ་འམ། མྱི་ཆེ་བ་འམ། མྱི་གདུང་བ་འམ། ཤིན་ཏུ་མཐོང་བ་འམ། གྱ་ནོམ་སྣང་བ་འམ། འོག་མྱིན་གྱི་ལྷ་རྣམས་སམ། སུས་ཀྱང་རུང་སྟེ། དགེ་བའི་རྩ་བ་ཇི་སྙེད་ཅིག་བསྐྱེད་པ་དེ་དག་ཐམས་ཅད་མངོན་པར་བསྡུས་ཏེ། གཅིག་ཏུ་བརྟུལ་ནས། ཚད་བཟུང་སྟེ། རྗེས་སུ་ཡི་རང་བའི་རབ་དམ་པ། མཆོག་ཕུལ། གཙོ་བོ། །​གྱ་ནོམ་པ། བླ་ན་མྱེད་པ། གོང་ན་མྱེད་པ། མཉམ་པ་མྱེད་པ། མྱི་མཉམ་པ་དང་མཉམ་པས་རྗེས་སུ་ཡི་རང་བར་བྱས་ཏེ། རྗེས་སུ་ཡི་རང་བར་བྱས་ནས་ཀྱང་། སེམས་ཅན་ཐམས་ཅད་དང་ཐུན་མོང་དུ་བྱས་ཏེ། བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །​དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས། ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །​གལ་ཏེ་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ།