The Perfection of Wisdom in One Hundred Thousand Lines
F.363.b
།དེ་ནས་ཚེ་དང་ལྡན་པ་རབ་འབྱོར་ཀྱི་སེམས་ཀྱིས་ལྷའི་བུ་དེ་དག་གི་སེམས་ཀྱི་རྣམ་པར་རྟོག་པ་སེམས་ཀྱིས་ཡོངས་སུ་ཤེས་ནས་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ལྷའི་བུ་དག་བདག་གིས་ཆོས་བསྟན་པ་ནི་སྒྱུ་མ་ལྟ་བུ་སྟེ། ལྷའི་བུ་དག་བདག་ལ་ཆོས་ཉན་པ་ཡང་སྒྱུ་མ་ལྟ་བུར་བཙལ་བར་བྱའོ། །ལྷའི་བུ་དག་བདག་གིས་ཆོས་བསྟན་པ་ནི་སྤྲུལ་པ་ལྟ་བུ་སྟེ། བདག་ལ་ཆོས་ཉན་པ་ཡང་སྤྲུལ་པ་ལྟ་བུར་བཙལ་བར་བྱ་སྟེ། དེ་དག་ནི་ཅི་ཡང་ཉན་པ་མྱེད་ཅིང་། ཅི་ཡང་མངོན་དུ་བྱེད་པ་མྱེད་དོ། །དེ་ནས་ལྷའི་བུ་དེ་དག་གིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཅི་སེམས་ཅན་དེ་དག་སྒྱུ་མ་ལྟ་བུ་སྟེ། ཆོས་ཉན་པ་དེ་དག་སྒྱུ་མ་ལྟ་བུ་ཡིན་ནམ། སེམས་ཅན་དེ་དག་སྤྲུལ་པ་ལྟ་བུ་སྟེ། ཆོས་ཉན་པ་དེ་དག་སྤྲུལ་པ་ལྟ་བུ་ཡིན་ནམ། རབ་འབྱོར་ཀྱིས་སྨྲས་པ། ལྷའི་བུ་དག་དེ་དེ་བཞིན་ནོ། དེ་དེ་བཞིན་ཏེ། སེམས་ཅན་དེ་དག་ནི་སྒྱུ་མ་ལྟ་བུ་སྟེ། ཆོས་ཉན་པ་དེ་དག་སྒྱུ་མ་ལྟ་བུའོ། །སེམས་ཅན་དེ་དག་ནི་སྤྲུལ་པ་ལྟ་བུ་སྟེ། ཆོས་ཉན་པ་དེ་དག་སྤྲུལ་པ་ལྟ་བུའོ། །ལྷའི་བུ་དག་སེམས་ཅན་དེ་དག་ནི་རྨྱི་ལམ་ལྟ་བུའོ། །ལྷའི་བུ་དག་སེམས་ཅན་དེ་དག་ནི་སྒྱུ་མ་ལྟ་བུའོ། །ལྷའི་བུ་དག་གཟུགས་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །ལྷའི་བུ་དག་ཚོར་བ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །ལྷའི་བུ་དག་འདུ་ཤེས་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །ལྷའི་བུ་དག་འདུ་བྱེད་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །ལྷའི་བུ་དག་རྣམ་པར་ཤེས་པ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །ལྷའི་བུ་དག་མྱིག་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །རྣ་བ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །སྣ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །ལྕེ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །ལུས་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །ཡིད་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །གཟུགས་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །སྒྲ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །དྲི་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །རོ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །རེག་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །ཆོས་ཀྱང་རྨྱི་ལམ་ལྟ་བུ་སྒྱུ་མ་ལྟ་བུའོ། །མྱིག་གི་རྣམ་པར་ཤེས་པ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །རྣ་བའི་རྣམ་པར་ཤེས་པ་ཡང་རྨྱི་ལམ་ལྟ་བུ་སྒྱུ་མ་ལྟ་བུའོ། །
eKangyur, UT4CZ5369-I1KG9143-0000, page 726 (363b).
About the eKangyur
The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.
Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.
The English translation of this folio by 84000 Translating the words of the Buddha can be found at:
https://read.84000.co/translation/toh8/UT22084-014-001-96186#UT22084-014-001-96186