སྙིང་རྗེ་པད་མ་དཀར་པོ།

The White Lotus of Compassion
F.194.a

Karuṇā­puṇḍarīka
F.194.a, volume 50, Degé Kangyur

བམ་པོ་བདུན་པ། རིགས་ཀྱི་བུ་དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་དགུ་པ་སྡིག་མེད་ཅེས་བྱ་བ་ལ་སྨྲས་པ་དང་། སྔ་མ་བཞིན་དུ་སྦྱར་ཏེ། དེས་གསོལ་པ། བཙུན་པ་བཅོམ་ལྡན་འདས་ཅི་ནས་ཀྱང་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ན། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་བཞུགས་ཏེ་འཚོ་ཞིང་གཞེས་པ་རྣམས་བདག་གི་དཔང་ལགས་པར་འགྱུར་བ་དེ་ལྟར་བདག་གིས་བྱང་ཆུབ་སེམས་དཔའི་སྤྱད་པ་སྤྱོད་པར་བགྱི་སྟེ། བཙུན་པ་བཅོམ་ལྡན་འདས་གང་བདག་གིས་ཁྱོད་ཀྱི་སྤྱན་སྔར་བྱང་ཆུབ་ཏུ་སེམས་བསྐྱེད་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་བར་དུ་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་འགྱོད་པའི་སེམས་སྐྱེ་བར་མ་གྱུར་ཅིག །​བྱང་ཆུབ་ཀྱི་མཐར་ཐུག་པ་ཉེ་བར་བཟུང་བའི་བར་དུ་དམ་བཅས་པ་བརྟན་ཞིང་ཇི་སྐད་སྨྲས་པ་དེ་བཞིན་དུ་བགྱིད་པར་གྱུར་ཅིག །​སེམས་ཅན་གཞན་གྱི་སེམས་འཁྲུག་པར་མི་བགྱིད་པར་གྱུར་ཅིག །​བདག་ཉན་ཐོས་དང་རང་སངས་རྒྱས་ཀྱི་ཐེག་པར་སེམས་མི་བསྐྱེད་པར་གྱུར་ཅིག །​འདོད་པའི་འདོད་ཆགས་ཀྱི་སེམས་དང་། སེམས་ལས་བྱུང་བ་སྐྱེ་བར་མ་གྱུར་ཅིག །​རྨུགས་པ་དང་གཉིད་དང་ལྡན་པར་མ་གྱུར་ཅིག །​རྒོད་པ་དང་ལྡན་པར་མ་གྱུར་ཅིག །​འགྱོད་པ་དང་ལྡན་པར་མ་གྱུར་ཅིག །​ཐེ་ཙོམ་དང་ལྡན་པར་མ་གྱུར་ཅིག །​བྱང་ཆུབ་ཀྱི་མཐར་ཐུག་གི་བར་དུ་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན། སྲོག་གཅོད་པ་མ་མཆིས་པ་དང་། མ་བྱིན་པར་ལེན་པ་མ་མཆིས་པ་དང་། མི་ཚངས་པར་སྤྱོད་པ་མ་མཆིས་པ་དང་། བརྫུན་དུ་སྨྲ་བ་མ་མཆིས་པ་དང་། ཕྲ་མ་མ་མཆིས་པ་དང་། ངག་རྩུབ་པོ་མ་མཆིས་པ་དང་། ཚིག་ཀྱལ་པ་མ་མཆིས་པ་དང་། བརྣབ་སེམས་མ་མཆིས་པ་དང་། གནོད་སེམས་མ་མཆིས་པ་དང་། ལོག་པར་ལྟ་བ་མ་མཆིས་པ་དང་། ཐེ་ཙོམ་དང་ལྡན་པ་མ་མཆིས་པ་དང་། ཆོས་ལ་མི་གུས་པའི་སེམས་མ་མཆིས་པ་དང་། སླུ་བའི་སེམས་མ་མཆིས་ཤིང་ཆོས་དེ་དག་མ་མཆིས་པར་གྱུར་ཅིག །​བྱང་ཆུབ་ཀྱི་མཐར་ཐུག་པ་ཉེ་བར་བཟུང་བའི་བར་དུ་གོམ་པ་འདོར་

eKangyur, UT4CZ5369-I1KG9176-0000, page 387 (194a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh112/UT22084-050-003-1922#UT22084-050-003-1922