སྙིང་རྗེ་པད་མ་དཀར་པོ།

The White Lotus of Compassion
F.191.b

Karuṇā­puṇḍarīka
F.191.b, volume 50, Degé Kangyur

པ་རྣམས་དང་། དེ་དག་གིས་ལུས་ཇི་ལྟ་བུ་ཐོབ་པ་དང་། སེམས་ཅན་ལས་ཀྱི་རྐྱེན་ཇི་ལྟ་བུས་བདེ་བའམ། སྡུག་བསྔལ་གྱི་ཚོར་བ་མྱོང་བ་རྣམས་དང་། བཟོའི་གནས་ཇི་ལྟ་བུ་དག་དང་། ལས་ཀྱི་གནས་ཇི་ལྟ་བུ་དག་ལ་ཆགས་པ་རྣམས་ལ་དེ་ལྟ་བུའི་ལུས་སུ་སྤྲུལ་ནས། བཟོའི་གནས་དང་། ལས་ཀྱི་གནས་དེ་ལྟ་བུ་དག་ལ་བརྩོན་པ་སྟོན་པར་བགྱིད་ཅིང་། དེ་ལྟ་བུའི་ཡི་གེ་བརྗོད་པས་སེམས་ཅན་རྣམས་ཀྱི་སེམས་མགུ་བར་བགྱིད་ཅིང་ཆོས་ཀྱང་སྟོན་པར་གྱུར་ཅིག །​བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་ཅིང་བཙུད་པ་དང་རབ་ཏུ་འགོད་པར་ཡང་གྱུར་ཅིག །​བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པ་ལ་འགོད་པར་ཡང་གྱུར་ཅིག །​བཙུན་པ་བཅོམ་ལྡན་འདས་བདག་གིས་ཕྱོགས་བཅུའི་སངས་རྒྱས་ཀྱི་ཞིང་སྟོང་ཕྲག་བཅུ་པོ་ཐམས་ཅད་དག་ན་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་ཡང་ཅི་ནས་ཀྱང་སྔོན་གྱི་ལས་དང་། ཉོན་མོངས་པ་མ་ལུས་པར་འགྱུར་བ་དང་། སེམས་ཅན་འགའི་སེམས་ཀྱི་རྒྱུད་ཀྱི་ལམ་ཡང་བདུད་བཞིས་རྟོགས་པར་མི་འགྱུར་བ་དེ་ལྟར་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ཡོངས་སུ་སྦྱོང་བར་འགྱུར་བ་དེ་སྲིད་དུ་བདག་གིས་བྱང་ཆུབ་ཀྱི་སྤྱོད་པ་སྤྱད་པར་བགྱིའོ། །​དེའི་སླད་དུ་བདག་གིས་སངས་རྒྱས་ཀྱི་ཁྲི་ཡང་ཇི་ལྟར་དེ་བཞིན་གཤེགས་པ་སྣང་བ་རྡུལ་བྲལ་སྤོས་མཐོ་དབང་ཕྱུག་རྒྱལ་པོ་སྐར་མའི་སངས་རྒྱས་ཀྱི་ཞིང་དྲི་སྔོ་སྣང་བ་རྡུལ་བྲལ་གྱི་ཡོན་ཏན་བཀོད་པ་ཅི་འདྲ་བ་དེ་ལྟར་ཡོངས་སུ་དག་པར་འཇོག་པར་གྱུར་ཅིག །​དེ་བཞིན་དུ་བདག་གིས་བདག་གི་སངས་རྒྱས་ཀྱི་ཞིང་དང་། བདག་གི་འཁོར་ཡང་ཇི་ལྟར་བྱང་ཆུབ་སེམས་དཔའ་སེང་གེ་སྤོས་ཀྱིས་སྨོན་ལམ་བཏབ་པ་བཞིན་དུ་གྱུར་ཅིག །​བཙུན་པ་བཅོམ་ལྡན་འདས་གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་ཕྱོགས་བཅུའི་སངས་རྒྱས་ཀྱི་ཞིང་དག་གི་སེམས་ཅན་རྣམས་ཀྱི་སྡུག་བསྔལ་ཐམས་ཅད་རབ་ཏུ་ཞི་བར་གྱུར་ཅིག །​ཐམས་ཅད་ཀྱང་སེམས་མཉེན་པར་གྱུར་ཅིག །​སེམས་ལས་སུ་རུང་བར་གྱུར་ཅིག །​རང་རང་གི་གླིང་བཞི་པ་དག་ན་སངས་རྒྱས་བཞུགས་པ་དག་མཐོང་བར་གྱུར་ཅིག །​སེམས་ཅན་དེ་དག་ལ་རིན་པོ་ཆེ་སྣ་ཚོགས་དག་དང་། མེ་ཏོག་དང་། སྤོས་དང་། བྱུག་པ་དང་། ཕྱེ་མ་དང་།

eKangyur, UT4CZ5369-I1KG9176-0000, page 382 (191b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh112/UT22084-050-003-1917#UT22084-050-003-1917