The Chapter on Medicines
F.244.a

དགོན་པའི་ལམ་དུ་ཞུགས་སོ། །​དེ་ལ་དེད་དཔོན་གཅིག་ནི་ཤིང་རྟ་པ་ལྔ་བརྒྱ་དང་དགོན་པའི་ལམ་གྱི་མགོ་ན་འདུག་གོ། །​དེད་དཔོན་ཅིག་ཤོས་ནི་ཤིང་རྟ་པ་ལྔ་བརྒྱ་དང་དགོན་པའི་ལམ་དུ་ཞུགས་སོ། །​དེད་དཔོན་གྱི་མི་ཚོང་པའི་མདུན་ནས་འགྲོ་བས་སྐྱེས་བུ་ནག་པོ་མིག་ཆེ་ལ་དམར་བ་བོང་བུའི་ཤིང་རྟར་ཞུགས་པ། འཁོར་ལོ་རྫབ་ཀྱིས་ཡོག་པ། གོས་རླན་པ་སྐྲ་གཤེར་བ་མེ་ཏོག་ཀུ་མུ་དའི་ཕྲེང་བས་མགོ་བོ་བཅིངས་པ། མགོ་འདྲེན་དང་དཀྱུས་མ་དག་དབྱངས་སུ་ལེན་པ་མཐོང་ངོ་། །​མཐོང་ནས་ཀྱང་འདི་སྐད་ཅེས་སྨྲས་སོ། །​ཀྱེ་ནང་རྗེ་ཅི་དགོན་པའི་ལམ་དུ་ལྷས་ཆར་ཕབ་ནས་རྩྭ་དང་ཆུ་སར་པ་མང་དུ་སྐྱེས་སམ་ཀྱེ་ནང་རྗེ་བདེན་ཏེ། དགོན་པའི་ལམ་དུ་ལྷས་ཆར་ཕབ་ནས་རྩྭ་དང་ཆུ་སར་པ་མང་དུ་བསྐྱེད་ཀྱིས། ཤེས་ལྡན་དག་རྩྭ་དང་ཆུ་རྙིང་པས་ཁལ་རྣམས་དུབ་པར་མ་བྱས་པར་འོར་ཅིག །​ཁྱེད་ཅག་རྩྭ་དང་ཆུ་སར་པ་ལ་ལོངས་སྤྱོད་དང་བདེ་བ་དང་ལེགས་པར་དགོན་པའི་ལམ་མ་རྟོལ་བ་ལྷག་མ་ཡང་རྟོལ་བར་འགྱུར་རོ། །​དེ་ནས་དེད་དཔོན་གྱི་མི་འགྲོན་པ་གང་ན་བ་དེར་སོང་སྟེ་ཕྱིན་པ་དང་། འགྲོན་པ་དེ་དག་ལ་འདི་སྐད་ཅེས་སྨྲས་སོ། །​ཤེས་ལྡན་དག་ཤེས་པར་གྱིས་ཤིག །​ཁོ་བོ་ཚོང་པ་རྣམས་ཀྱི་མདུན་ནས་འགྲོ་བ་ན་འདི་ན་སྐྱེས་བུ་ནག་པོ་མིག་ཆེ་ལ་དམར་བ་བོང་བུའི་ཤིང་རྟར་ཞུགས་པ། འཁོར་ལོ་རྫབ་ཀྱིས་ཡོག་པ་གོས་རླན་པ། སྐྲ་གཤེར་བ་མེ་ཏོག་ཀུ་མུ་དའི་ཕྲེང་བས་མགོ་བོ་བཅིངས་པ། མགོ་འདྲེན་དང་དཀྱུས་མ་དག་དབྱངས་སུ་ལེན་པ་མཐོང་ངོ་། །​མཐོང་ནས་ཀྱང་འདི་སྐད་ཅེས་ཀྱེ་ནང་རྗེ་ཅི་དགོན་པའི་ལམ་དུ་ལྷས་ཆར་ཕབ་ནས་རྩྭ་དང་ཆུ་སར་པ་མང་དུ་སྐྱེས་སམ་ཞེས་བྱས་པ་དང་། དེ་འདི་སྐད་ཅེས་ཀྱེ་ནང་རྗེ་བདེན་ཏེ། དགོན་པའི་ལམ་དུ་ལྷས་ཆར་ཕབ་ནས་རྩྭ་དང་ཆུ་སར་པ་བསྐྱེད་ཀྱིས། ཤེས་ལྡན་དག་རྩྭ་དང་ཆུ་རྙིང་པས་ཁལ་རྣམས་དུབ་པར་མ་བྱས་པར་འོར་ཅིག །​ཁྱེད་ཅག་རྩྭ་དང་ཆུ་སར་པ་ལ་ལོངས་སྤྱོད་དང་བདེ་བ་དང་ལེགས་པར་དགོན་པའི་ལམ་མ་རྟོལ་བ་ལྷག་མ་ཡང་རྟོལ་བར་འགྱུར་རོ་ཞེས་ཟེར་གྱིས། བདག་ཅག་གི་ཁལ་རྣམས་མ་དུབ་པར་རྩྭ་དང་ཆུ་བོར་ལ་བདག་ཅག་རྩྭ་དང་ཆུ་སར་པ་ལ་ལོངས་སྤྱད་ནས་བདེ་བ་དང་ལེགས་པར་དགོན་པའི་ལམ་མ་རྟོལ་བ་ལྷག་མ་ཡང་རྟོལ་བར་བྱའོ་ཞེས་དེ་རྣམས་ཀྱིས་རྩྭ་དང་ཆུ་རྙིང་པ་བོར་ཏེ་དགོན་པའི་ལམ་དུ་ཞུགས་པ་ལས་དེ་རྣམས་དོང་ནས་ཞག་གཅིག་ལོན་ཡང་རྩྭ་དང་ཆུ་སར་པ་མ་རྙེད་དོ།