སྨན་གྱི་གཞི།

The Chapter on Medicines
F.185.b

Bhaiṣajya­vastu
F.185.b, volume 2, Degé Kangyur

བྱས་སོ། །​བཻ་ཌཱུརྱ་ལས་བྱས་པའི་ནི་ཤེལ་ལས་བྱས་སོ། །​ཤེལ་ལས་བྱས་པའི་གཟུངས་གཟེར་དང་། གདང་བུ་དང་། ལན་ཀན་གྱི་རྟེན་མ་བཻཌཱུརྱ་ལས་བྱས་སོ། །​ཆོས་དང་མཐུན་པའི་རྫིང་བུ་ཆུ་ནས་སྐྱེས་པའི་མེ་ཏོག་རྣམ་པ་སྣ་ཚོགས་འདི་ལྟ་སྟེ། ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། དྲི་ཞིམ་པ་དང་། དྲི་ངད་འཇམ་པ་དང་། དུས་ཚིགས་ཐམས་ཅད་པ་དང་། དུས་ཐམས་ཅད་པའི་མེ་ཏོག་སྐྱེ་བོ་ཐམས་ཅད་ལ་དགག་པ་མེད་པ་བསྐྱེད་དོ། །​ཆོས་དང་མཐུན་པའི་རྫིང་གི་འགྲམ་གཉིས་སུ་ཐང་ལ་སྐྱེ་བའི་མེ་ཏོག་རྣམ་པ་སྣ་ཚོགས་འདི་ལྟ་སྟེ། ཨ་ཏི་མུག་ཏ་ཀ་དང་། ཙམ་པ་ཀ་དང་། པ་ཏ་ལ་དང་། པ་རི་ཀ་ཤ་དང་། མ་ལི་ཀ་དང་། ན་བམ་ལི་ཀ་དང་། ཡིད་དུ་འོང་དང་། ཡུ་ཏི་ཀ་དང་། དྷཱ་ནུ་སྐ་རི་དང་། དུས་ཚིགས་ཐམས་ཅད་པ་དང་། དུས་ཐམས་ཅད་པའི་མེ་ཏོག་སྐྱེ་བོ་ཐམས་ཅད་ལ་དགག་པ་མེད་པ་དག་བསྐྱེད་དོ། །​ཆོས་དང་མཐུན་པའི་རྫིང་དུ་གསེར་གྱི་གཅལ་བཀྲམ་ཞིང་ཙན་དན་གྱི་ཆུས་བཀང་ལ་གསེར་གྱི་དྲ་བ་དང་། གསེར་གྱི་དྲིལ་བུ་གཡེར་ཀ་བརྒྱུས་པས་བྲེས་སོ། །​དེ་ནས་ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་གིས་ཆོས་དང་མཐུན་པའི་རྫིང་གི་བྱ་བ་ཐམས་ཅད་ཟིན་པར་རིག་ནས། ཆོས་དང་མཐུན་པའི་རྫིང་གི་མདུན་དུ་ཆོས་དང་མཐུན་པའི་ཤིང་ཏ་ལའི་ཚལ་མཆུར་དཔག་ཚད་གཅིག་རྒྱར་དཔག་ཚད་གཅིག་པ་ཞིག་བཙུགས་ཏེ། ཆོས་དང་མཐུན་པའི་ཤིང་ཏ་ལའི་ཚལ་དུ་ཏ་ལ་རྣམ་པ་བཞི་པོ་གསེར་ལས་བྱས་པ་ནས་ཤེལ་ལས་བྱས་པའི་བར་བཙུགས་པ་ལ། གསེར་ལས་བྱས་པའི་ལོ་མ་དང་། མེ་ཏོག་དང་། འབྲས་བུ་དངུལ་ལས་བྱས་པ་བཙུགས་སོ། །​དངུལ་ལས་བྱས་པའི་ནི་གསེར་ལས་བྱས་སོ། །​གསེར་ལས་བྱས་པའི་ནི་བཻ་ཌཱུརྱ་ལས་བྱས་སོ། །​བཻ་ཌཱུརྱ་ལས་བྱས་པའི་ལོ་མ་དང་། མེ་ཏོག་དང་། འབྲས་བུ་ཤེལ་ལས་བྱས་པ་བཙུགས་སོ། །​ཡང་ཤིང་ཏ་ལའི་ཚལ་དེ་རྣམས་རླུང་གིས་བསྐྱོད་པ་ན་འདི་ལྟ་བུའི་སྒྲ་ཡིད་དུ་འོང་བ་འབྱུང་བར་འགྱུར་ཏེ། དཔེར་ན་སྐྱེས་བུ་མཁས་པས་སིལ་སྙན་ཡན་ལག་ལྔ་དང་ལྡན་པ་ཡང་དག་པར་ལེགས་པར་བསྒྲགས་པ་བཞིན་ནོ། །​ཆོས་དང་མཐུན་པའི་ཤིང་ཏ་ལའི་ཚལ་ལ་ལན་ཀན་རྣམ་པ་བཞི་པོ་གསེར་ལས་བྱས་པ་དང་། དངུལ་

eKangyur, UT4CZ5369-I1KG9128-0000, page 370 (185b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh1-6/UT22084-001-006-8265#UT22084-001-006-8265