བཅོམ་ལྡན་འདས་ཀྱི་ཡེ་ཤེས་རྒྱས་པའི་མདོ་སྡེ་རིན་པོ་ཆེ་མཐའ་ཡས་པ་མཐར་ཕྱིན་པ།

The Precious Discourse on the Blessed One’s Extensive Wisdom That Leads to Infinite Certainty
F.137.b

Niṣṭhā­gata­bhagavajjñāna­vaipulya­sūtra­ratnānanta
F.137.b, volume 47, Degé Kangyur

ཀུན་གཟིགས་སྐྱོབ་ལ་བཀུར་སྟི་བྱས་པས་སུ། །​དགེ་རྩ་དེ་ཡིས་ད་ལྟར་བྱུང་ཤེས་ང་རྣམ་སྦྱངས། །​དེ་འདྲའི་དགེ་རྩ་མེད་ན་ཀུན་མཐོང་མི་ནུས་ཏེ། །​དགེ་རྩ་གང་གིས་ད་ལྟར་བྱུང་ཤེས་ང་རྣམ་སྦྱངས། །​ང་ནི་ཆོས་གང་མི་ཤེས་ཅི་ཡང་མེད་པས་ན། །​བདུད་ཀྱི་ཞགས་པའི་རྒྱུད་ལས་སེམས་ཅན་ཐར་བར་བྱ། །​མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་ཡོངས་སུ་དྲི་བའི་རང་བཞིན་ཅན་དུ་བྱ་སྟེ། མཽད་གལ་གྱི་བུ་བྱང་ཆུབ་སེམས་དཔའ་ཡོངས་སུ་འདྲི་བའི་རང་བཞིན་ཅན་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །​མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པའི་འཁོར་བ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཁྲིད་མཛད་ཅེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་སྟེ། དེའི་ཚེ་འཛམ་བུའི་གླིང་འདི་ཞེང་དུ་དཔག་ཚད་དྲུག་ཁྲིར་གྱུར་ཅིང་། ཀུན་ནས་གྲུ་བཞི་ལ་ཇི་ཙམ་དུ་སྲིད་དུ་ཡོད་པ་དེ་ཙམ་དུ་ཞེང་དུ་ཡང་གྲུ་བཞི་སྟེ། འདི་ལྟ་སྟེ་མཛེས་པར་སྤྲུལ་པ་ཤིན་ཏུ་རྣམ་པར་ཕྱེ་བ་མིག་མངས་རིས་སུ་བྲིས་པ། གསེར་གྱི་གདུགས་ཀྱིས་ཤིན་ཏུ་བཀབ་པ། ལག་མཐིལ་ལྟར་མཉམ་པར་གྱུར་ཏོ། །​དེའི་ཚེ་ང་འཛམ་བུའི་གླིང་གི་རྒྱལ་པོར་གྱུར་ཏེ། ཆོས་ཀྱི་རྒྱལ་པོ་ཆོས་དང་ལྡན་པ་རྒྱལ་བའི་སྡེ་ཞེས་བྱའོ། །​དེའི་བུ་སྟོང་ཚང་བར་བྱུང་སྟེ། དེའི་བུ་ཐུ་བོ་གཞོན་ནུ་ཞི་བའི་བློ་གྲོས་ཞེས་བྱ་བ་སངས་རྒྱས་དཔག་ཏུ་མེད་པ་ལ་བསྙེན་བཀུར་བྱས་པ། བྱང་ཆུབ་སེམས་དཔའི་ཆོས་ཐམས་ཅད་ལ་འདྲིས་པར་བྱས་པ་སྟོང་པ་ཉིད་ལ་མོས་པ། ཆོས་ཟབ་མོའི་བཟོད་པ་དང་ལྡན་པ་རྒྱ་ཆེན་པོ་ལ་མོས་ཤིང་། ཆོས་དམན་པ་ལ་མ་མོས་ཏེ། ཆོས་དམན་པ་ལ་རྣམ་པར་སྨོད་པ། བློ་གྲོས་ཤིན་ཏུ་ཞིབ་པ་ཞིག་བྱུང་ངོ་། །​དེ་ནས་རྒྱལ་པོ་རྒྱལ་བའི་སྡེ་འདི་སྙམ་དུ་གྱུར་ཏེ། གཞོན་ནུ་འདི་ནི་ཤིན་ཏུ་བློ་ཟབ་ཅིང་ཆོས་དང་ལྡན་པ་ཡིན་ཏེ། བདག་གིས་དེའི་བསམ་པ་ཡོངས་སུ་རྫོགས་པར་བྱའོ་སྙམ་ནས། དེས་དེ་ལ་སྨྲས་པ། གཞོན་ནུ་ཁྱོད་ཀྱི་བྱ་བ་ཅི་ཡོད། དེས་སྨྲས་པ། ཡབ་གལ་ཏེ་བདག་ལ་ཐུགས་དཔག་མཛད་ན། དགེ་སྦྱོང་དང་བྲམ་ཟེ་མང་དུ་ཐོས་པ་ལས་བསྡུར་གསོལ། ཡབ་བདག་ཆོས་རྣམས་ལ་ཐེ་ཙོམ་མཆིས་ཏེ། དེ་བདག་གིས་དྲི་བར་བགྱི་ན། འདི་ལྟར་ཆོས་ཀྱི་ཐེ་ཚོམ་གཅོད་པ་རྡོ་ཐོགས་

eKangyur, UT4CZ5369-I1KG9173-0000, page 274 (137b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh99/UT22084-047-001-2824#UT22084-047-001-2824