རྒྱ་ཆེར་རོལ་པ།

The Play in Full
F.195.b

Lalita­vistara
F.195.b, volume 46, Degé Kangyur

ཕྱིར་གཤེགས་ནས། བསོད་སྙོམས་ཀྱི་ཞལ་ཟས་མཇུག་ཏུ་གསོལ་ཏེ། ཟས་ཀྱི་བྱ་བ་བྱས་ནས་དྲང་སྲོང་ལྷུང་བ་རི་དགས་ཀྱི་ནགས་ག་ལ་བ་དང་། ལྔ་སྡེ་བཟང་པོ་ག་ལ་བ་དེར་གཤེགས་པ་དང་། ལྔ་སྡེ་བཟང་པོ་དག་གིས་དེ་བཞིན་གཤེགས་པ་རྒྱང་རིང་པོ་ནས་གཤེགས་པ་མཐོང་ངོ་། །མཐོང་ནས་ཀྱང་འདི་སྐད་དུ་ཚེ་དང་ལྡན་པ་དག་དགེ་སྦྱོང་གཽ་ཏ་མ་ལྷོད་པ། མང་དུ་ཟ་བ། སྤོང་བ་ལས་ཉམས་པ་འདི་འོངས་ཏེ། འདིས་སྔོན་གྱི་དཀའ་བ་སྤྱད་པ་དེས་མིའི་ཆོས་བླ་མ་ལས་མཆོག་ཏུ་གྱུར་པ། འཕགས་པའི་ཡེ་ཤེས་མཐོང་བའི་ཁྱད་པར་ཅུང་ཟད་ཀྱང་མངོན་སུམ་དུ་བྱེད་མ་ནུས་ནས། ད་ལྟར་ཁ་ཟས་རགས་པ་ཟ་ཞིང་བསོད་སྙོམས་ལ་སྦྱོར་བ་དང་ལྡན་པར་གནས་པ་ལྟ་སྨོས་ཀྱང་ཅི་དགོས་ཏེ། ལྷོད་པ་མང་དུ་ཟ་བ། འདི་ལ་སྐལ་བ་མེད་ཀྱིས་གང་གིས་ཀྱང་འདི་བསུ་བར་མི་བྱའོ། །​ལྡང་བར་མི་བྱའོ། །​ཆོས་གོས་དང་ལྷུང་བཟེད་བླང་བར་མི་བྱའོ། །​སྟན་དང་ཡོངས་སུ་སྤྱད་པར་འོས་པའི་བཏུང་བ་དང་། རྐང་པ་གཞག་པ་ཡང་སྦྱིན་པར་མི་བྱའོ། །​སྟན་ལྷག་པ་གཞན་ནི་མ་གཏོགས་ཏེ། ཚེ་དང་ལྡན་པ་གཽ་ཏ་མ་སྟན་ལྷག་པ་གཞན་འདི་དག་ཡོད་ཀྱིས་ཇི་སྟེ་འདོད་ན་འདུག་ཤིག་པར་བརྗོད་དོ་ཞེས་འོག་ཁྲིམས་བཅས་སོ། །​ཚེ་དང་ལྡན་པ་ཀུན་ཤེས་ཀཽཎྜི་ནྱས་སེམས་ཀྱིས་ནི་ཁས་མ་བླངས་ཏེ་ཚིག་གིས་ནི་མི་རུང་ཞེས་མ་བྱས་སོ། །​དགེ་སློང་དག་དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་ག་ལ་བ་དེར་གཤེགས་པ་དེ་ལྟ་དེ་ལྟར་དེ་དག་རང་རང་གི་སྟན་ལ་མི་དགའ་ཞིང་ལྡང་འདོད་པར་གྱུར་ཏེ། འདི་ལྟ་སྟེ་དཔེར་ན་འདབ་ཆགས་བྱ་སྐོན་པར་བཅུག་པར་གྱུར་ལ། སྐོན་པ་དེའི་འོག་ནས་མེས་བདུགས་ན། དེ་མེས་གདུངས་པས་མྱུར་བ་མྱུར་བར་འཕར་བར་འདོད་ཅིང་འཕུར་འདོད་པ་དེ་བཞིན་དུ། དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གི་གན་དུ་གཤེགས་པ་དེ་ལྟ་དེ་ལྟར་ལྔ་སྡེ་བཟང་པོ་དག་རང་རང་གི་སྟན་ལ་མི་དགའ་ཞིང་ལྡང་འདོད་པར་གྱུར་ཏོ། །​དེ་ཅིའི་ཕྱིར་ཞེ་ན། གང་དག་དེ་བཞིན་གཤེགས་པ་མཐོང་ནས་སྟན་ལས་མི་ལྡང་བའི་སེམས་ཅན་དེ་ནི་སེམས་ཅན་གྱི་རིས་ན་གང་ཡང་མེད་དོ། །​དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གི་གན་དུ་གཤེགས་པ་དེ་ལྟ་དེ་ལྟར་ལྔ་སྡེ་

eKangyur, UT4CZ5369-I1KG9172-0000, page 390 (195b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh95/UT22084-046-001-4450#UT22084-046-001-4450