བསྐལ་པ་བཟང་པོ།

The Good Eon
F.271.b

Bhadra­kalpika
F.271.b, volume 45, Degé Kangyur

གིས་བྱང་ཆུབ་ཐོབ་པ་པོ། །​བྱེ་བ་ཕྲག་ནི་དགུ་བཅུ་དགུ་དགུ་ཡོད། །​མི་ཚེ་ལོ་གྲངས་དགུ་ཁྲི་སུམ་སྟོང་ཡིན། །​བྱང་ཆུབ་ཏུ་ནི་ཡོངས་སུ་སྨིན་བྱའི་ཕྱིར། །​དམ་ཆོས་ལོ་གྲངས་སུམ་ཁྲིར་གནས་པར་འགྱུར། །​མཆོད་རྟེན་དཔག་ཚད་བཅུ་གཉིས་པ་འབྱུང་སྟེ། །​རིན་ཆེན་ཐེར་འབུམ་སྙེད་ཀྱིས་སྤྲས་པར་འགྱུར། །​དེ་བཞིན་གཤེགས་པ་བསོད་ནམས་དགྱེས་པ་ཡི། །​སྐྱེ་ཡུལ་བསོད་ནམས་སྣང་བར་བྱེད་ཅེས་བྱ། །​རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །​སྟོང་གསུམ་ཙམ་ཡོད་ཡབ་ནི་འོད་ལྡན་ཡིན། །​བདུད་རྩིའི་འོད་ནི་རྒྱལ་ཡུམ་རྩི་སྨན་ནི། །​སྲས་ཡིན་སྨན་པ་བཟང་པོ་རིམ་གྲོ་པ། །​བྱང་ཆུབ་འོད་ཅེས་བྱ་བ་མཁས་པ་སྟེ། །​རྣམ་པར་བརྩེ་བའི་བློ་ནི་རྫུ་འཕྲུལ་ཅན། །​འདུས་པ་ལན་གྲངས་དགུ་བཅུ་ཀུན་ལ་ཡང་། །​གཟུངས་ཐོབ་བྱང་ཆུབ་དག་ལ་རབ་གནས་པ། །​བྱེ་བ་ཕྲག་ནི་ཁྲི་ཕྲག་དགུ་དགུ་ཡོད། །​མི་ཚེ་ལོ་གྲངས་དྲུག་འབུམ་སུམ་ཁྲི་ཡིན། །​བྱང་ཆུབ་ཏུ་ནི་ཡོངས་སུ་སྨིན་བྱའི་ཕྱིར། །​དམ་ཆོས་ལོ་གྲངས་དྲུག་འབུམ་སུམ་ཁྲིར་གནས། །​རྒྱལ་བའི་སྐུ་གདུང་དག་ནི་རྒྱས་འགྱུར་ལ། །​གསེར་གྱི་རྒྱལ་མཚན་མཆོག་སྟོང་སྙེད་ཀྱིས་བརྒྱན། །​དེ་བཞིན་གཤེགས་པ་དགའ་བའི་སྟོབས་སྐྱེ་བའི། །​ཡུལ་ནི་མཆོད་པས་ཀུན་དུ་ཚིམ་ཞེས་བྱ། །​རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །​དཔག་ཏུ་མེད་དོ་ཡབ་ནི་ཡིད་འཐད་ཡིན། །​ཕན་པར་སེམས་ཞེས་བྱ་བ་རྒྱལ་བའི་ཡུམ། །​སྲས་པོ་ཕན་འདོད་ཟླ་བ་རིམ་གྲོ་པ། །​བློ་གྲོས་ཡངས་པ་ཞེས་བྱ་མཁས་པ་སྟེ། །​གསེར་གྱི་འོད་ཅེས་བྱ་བ་རྫུ་འཕྲུལ་ཅན། །​ཕྱིར་མི་ལྡོག་པ་གཟུངས་ནི་ཐོབ་པ་པོ། །​འཇམ་པའི་དཔལ་དང་མཚུངས་པ་དེ་དག་ཀུན། །​འདུས་པ་དག་ནི་ཤིན་ཏུ་མཐའ་ཡང་ཡས། །​མི་ཚེ་ལོ་གྲངས་སུམ་འབུམ་ཉི་ཁྲི་ཡིན། །​ཐེག་པ་མཆོག་ལྡན་ཡོངས་སུ་སྨིན་བྱའི་ཕྱིར། །​ཡོངས་སུ་མྱ་ངན་འདས་ནས་དམ་ཆོས་དག །​ལོ་གྲངས་ཆིག་འབུམ་ཉི་ཁྲིར་གནས་པར་འགྱུར། །​རྒྱལ་བའི་སྐུ་གདུང་དག་ནི་རྒྱས་པར་འགྱུར། །​མཚུངས་པ་མེད་པ་དབྱངས་དག་སྙན་པ་ཡི། །​སྐྱེ་བའི་ཡུལ་ནི་འོད་ཀྱི་མཆོག་ཅེས་བྱ། །​དེའི་རིགས་བྲམ་ཟེ་ཡིན་ཏེ་འོད་ཀྱི་ཚད། །​དཔག་ཚད་སྟོང་ཡོད་ཡབ་ནི་དགེ་བཟང་ཡིན། །

eKangyur, UT4CZ5369-I1KG9171-0000, page 542 (271b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14396#UT22084-045-001-14396