བསྐལ་པ་བཟང་པོ།

The Good Eon
F.242.b

Bhadra­kalpika
F.242.b, volume 45, Degé Kangyur

དྲི་མ་མེད་གྱུར་པ། །​དེ་དག་ཐེར་འབུམ་ཐེར་འབུམ་འདུས་པར་འགྱུར། །​མི་ཚེ་ལོ་གྲངས་ཉི་ཁྲི་ཉིས་སྟོང་ཡིན། །​མྱ་ངན་འདས་ནས་དམ་པའི་ཆོས་དག་ཀྱང་། །​ལོ་གྲངས་དགུ་ཁྲིའི་བར་དུ་གནས་པར་འགྱུར། །​རྒྱལ་བའི་སྐུ་གདུང་བྱིན་གྱིས་བརླབས་ནས་ཀྱང་། །​འཇིག་རྟེན་སྐུ་གདུང་རྒྱས་ཤིང་གང་བར་འགྱུར། །​འཇིག་རྟེན་མགོན་པོ་མཐུ་སྟོབས་སྐྱེ་བ་ཡི། །​ཡུལ་ནི་ཡོན་ཏན་སྣང་བར་བྱེད་ཅེས་བྱ། །​རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །​དཔག་ཚད་བཅུ་ཡོད་ཡབ་ནི་ལྷ་བཟང་ཡིན། །​ལྷ་མཆོད་མ་ཞེས་བྱ་བ་རྒྱལ་བའི་ཡུམ། །​སྲས་པོ་སྒྲ་གཅན་སྐར་མ་རིམ་གྲོ་པ། །​ཡོན་ཏན་དག་གིས་བརྒྱན་པ་མཁས་པ་སྟེ། །​འཇིག་རྟེན་འཇིགས་པ་མེད་པ་རྫུ་འཕྲུལ་ཅན། །​འདུས་པ་ལན་གྲངས་བདུན་ཅུ་ཀུན་ལ་ཡང་། །​རྫུ་འཕྲུལ་རྐང་བཞིས་ཕ་རོལ་ཕྱིན་པ་པོ། །​བྱེ་བ་ཕྲག་ནི་བདུན་ཅུ་བཞི་བཞི་ཡོད། །​མི་ཚེ་ལོ་གྲངས་བདུན་ཁྲི་སུམ་སྟོང་ཡིན། །​མྱ་ངན་འདས་པ་དེ་ཡི་དམ་ཆོས་དག །​ལོ་གྲངས་བདུན་ཁྲིའི་བར་དུ་གནས་པར་འགྱུར། །​རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །​དཔག་ཚད་ལྔ་པ་གསེར་གྱི་མགོ་རྒྱན་ལྡན། །​སངས་རྒྱས་སྐར་མ་ལ་ནི་དགྱེས་པ་ཡི། །​སྐྱེ་བའི་ཡུལ་ནི་འོད་འཕྲོ་སྣང་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །​དཔག་ཚད་བཅུ་ཡོད་ཡབ་ནི་ལྷ་བཟང་ཡིན། །​མཆོག་མཆོད་མ་ཞེས་བྱ་བ་རྒྱལ་བའི་ཡུམ། །​སྲས་པོ་ལྟ་བྱེད་འོད་འཕྲོ་རིམ་གྲོ་པ། །​ཡོན་ཏན་ཁ་ལོ་སྒྱུར་བ་མཁས་པ་སྟེ། །​གནས་པ་མཐའ་ཡས་པ་ནི་རྫུ་འཕྲུལ་ཅན། །​འདུས་པ་ལན་གྲངས་སུམ་ཅུ་དྲུག་ཀུན་ལའང་། །​མཚོ་ལྟར་གང་བའི་བསམ་གཏན་པ་ཡི་གྲངས། །​བྱེ་བ་ཕྲག་ནི་བདུན་ཅུ་བཞི་བཞི་ཡོད། །​མི་ཚེ་ལོ་གྲངས་སུམ་ཁྲི་བཞི་སྟོང་ཡིན། །​རྒྱལ་བ་ཡོངས་སུ་མྱ་ངན་འདས་ནས་ཀྱང་། །​དམ་ཆོས་ལོ་གྲངས་སུམ་ཁྲིའི་བར་དུ་གནས། །​ལྷ་མི་དག་ལ་ཕན་ཕྱིར་རྒྱལ་བ་ཡི། །​སྐུ་གདུང་རྒྱས་ཤིང་རྣམ་པར་གང་བར་འགྱུར། །​དེ་བཞིན་གཤེགས་པ་སྤྲིན་གྱི་རྔ་སྒྲ་ཡི། །​སྐྱེ་བའི་ཡུལ་ནི་བདུད་རྩིའི་དབྱངས་ཞེས་བྱ། །​རིགས་ནི་བྲམ་ཟེ་ཡིན་ཏེ་འོད་དཔག་ཚད། །​དགུ་བཅུ་རྩ་གཉིས་ཡབ་ནི་ལེགས་བཟང་ཡིན། །​གདངས་སྙན་མ་ཞེས་བྱ་བ་

eKangyur, UT4CZ5369-I1KG9171-0000, page 484 (242b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14338#UT22084-045-001-14338