བསྐལ་པ་བཟང་པོ།

The Good Eon
F.205.a

Bhadra­kalpika
F.205.a, volume 45, Degé Kangyur

པ་སྤྱན་སྡུག་སྐྱེ་བ་ཡི། །​ཡུལ་ནི་བལྟ་ན་སྡུག་པ་ཞེས་ཀྱང་བྱ། །​རྒྱལ་བའི་རིགས་ནི་རྒྱལ་རིགས་འོད་དཔག་ཚད། །​དགུ་བཅུ་རྩ་དགུ་ཡབ་ནི་མཛེས་ལྡན་ཡིན། །​མཛེས་དགའ་མ་ཞེས་བྱ་བ་རྒྱལ་བའི་ཡུམ། །​སྲས་པོ་མིག་བཟངས་མིག་ལྡན་རིམ་གྲོ་པ། །​མཛེས་པ་འོད་ཅེས་བྱ་བ་མཁས་པ་སྟེ། །​འཇིག་རྟེན་དད་པར་བྱེད་པ་རྫུ་འཕྲུལ་ཅན། །​འདུས་པ་ལན་གྲངས་དྲུག་ཅུ་དྲུག་ཀུན་ལའང་། །​བྱང་ཆུབ་མཆོག་རབ་དགའ་ལ་ལེགས་གནས་པ། །​བྱེ་བ་ཕྲག་ནི་ཁྲི་ཕྲག་བཅུ་བཅུ་ཡོད། །​མི་ཚེ་ལོ་གྲངས་བདུན་ཁྲི་ཉིས་སྟོང་ཡིན། །​རྒྱལ་བ་མྱ་ངན་འདས་ནས་དམ་ཆོས་དག །​ལོ་གྲངས་སུམ་ཁྲིའི་བར་དུ་གནས་པར་འགྱུར། །​མྱ་ངན་འདས་པའི་མཆོད་རྟེན་གཅིག་འབྱུང་ལ། །​རིན་ཆེན་བརྒྱ་ཡི་དྲ་བས་བསྐོར་བར་འགྱུར། །​དེ་བཞིན་གཤེགས་པ་ཀླུས་ནི་བྱིན་པ་ཡི། །​སྐྱེ་བའི་ཡུལ་ནི་ཀླུ་དང་ལྡན་ཞེས་བྱ། །​རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་དགུ་ཡོད་ཡབ་ནི་དོན་གནས་ཡིན། །​ཡོན་ཏན་ལྡན་ཞེས་བྱ་བ་རྒྱལ་བའི་ཡུམ། །​སྲས་པོ་ལེགས་མཐུ་བློ་མཐུ་རིམ་གྲོ་པ། །​དགེ་གནས་ཞེས་ནི་བྱ་བ་མཁས་པ་སྟེ། །​གཏི་མུག་མེད་པ་མཐའ་ཡས་རྫུ་འཕྲུལ་ཅན། །​འདུས་པ་ལན་གྲངས་དགུ་བཅུ་ཀུན་ལ་ཡང་། །​དགྲ་བཅོམ་དག་ནི་ཚང་བར་འདུས་འགྱུར་ཏེ། །​ཐེར་འབུམ་ཕྲག་ནི་དགུ་དགུ་འབྱུང་བར་འགྱུར། །​མི་ཚེ་ལོ་གྲངས་སྟོང་ཕྲག་བཅུ་གཅིག་ཡིན། །​ཡོངས་སུ་མྱ་ངན་འདས་པའི་དམ་ཆོས་དག །​ལོ་གྲངས་དག་ནི་སྟོང་དུ་གནས་པ་ཡིན། །​དཔག་ཚད་བརྒྱད་པའི་མཆོད་རྟེན་འབྱུང་འགྱུར་ཏེ། །​རིན་ཆེན་བརྒྱ་ཡི་དྲ་བས་རྣམ་པར་སྤྲས། །​དེ་བཞིན་གཤེགས་པ་བདེན་པའི་ཏོག་དག་གི། །​སྐྱེ་བའི་ཡུལ་ནི་གསལ་བའི་ཏོག་ཅེས་བྱ། །​དེ་ཡི་རིགས་ནི་རྒྱལ་རིགས་འོད་ཀྱི་ཚད། །​དཔག་ཚད་སྟོང་ཡོད་ཡབ་ནི་ཏོག་བཟངས་ཡིན། །​ཏོག་གི་རྒྱལ་མཚན་ཞེས་བྱ་རྒྱལ་བའི་ཡུམ། །​སྲས་པོ་སྒྲོན་མ་ལྷ་སྦྱིན་རིམ་གྲོ་པ། །​འོད་མཆོག་ཅེས་ནི་བྱ་བ་མཁས་པ་སྟེ། །​གསལ་བར་གནས་ཞེས་བྱ་བ་རྫུ་འཕྲུལ་ཅན། །​འདུས་པ་ལན་གྲངས་སུམ་ཅུ་ཀུན་ལ་ཡང་། །​སྲིད་པ་ཀུན་ལ་ཆགས་བྲལ་ཡིད་ལྡན་པ། །​དེ་དག་བྱེ་བ་ཕྲག་ནི་བརྒྱ་བརྒྱ་ཡོད། །​མི་ཚེ་ལོ་གྲངས་དག་ནི་ལྔ་འབུམ་ཡིན། །​འགྲོ་ལ་ཕན་ཕྱིར་དམ་པའི་

eKangyur, UT4CZ5369-I1KG9171-0000, page 409 (205a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14263#UT22084-045-001-14263