བསྐལ་པ་བཟང་པོ།

The Good Eon
F.202.a

Bhadra­kalpika
F.202.a, volume 45, Degé Kangyur

ལོ་གྲངས་བདུན་ཁྲི་བཞི་སྟོང་བར་དུ་གནས། །​རྒྱལ་བའི་སྐུ་གདུང་དག་ནི་རྒྱས་འགྱུར་ལ། །​ལྷ་དང་མི་མཆོག་དག་གིས་མཆོད་པར་འགྱུར། །​དེ་བཞིན་གཤེགས་པ་ཉི་མའི་འོད་ཟེར་གྱི། །​སྐྱེ་བའི་ཡུལ་ནི་ཏོག་གི་འོད་ཅེས་བྱ། །​རིགས་ནི་བྲམ་ཟེ་ཡིན་ཏེ་འོད་དཔག་ཚད། །​དགུ་བཅུ་རྩ་དགུ་ཡབ་ནི་ལྷ་བཟང་ཡིན། །​གསེར་འོད་མ་ནི་ཡུམ་ཡིན་སྲས་པོ་ནི། །​འོད་ཟེར་བྱིན་ཡིན་ལག་བཟངས་རིམ་གྲོ་པ། །​འོད་དང་ལྡན་པ་བློ་གྲོས་ཅན་ཡིན་ཏེ། །​སྒྲོན་མ་འོད་ཅེས་བྱ་བ་རྫུ་འཕྲུལ་ཅན། །​འདུས་པ་ལན་གྲངས་དྲུག་ཅུ་དྲུག་ཀུན་ལའང་། །​དགྲ་བཅོམ་ཆགས་པ་མེད་པར་གྱུར་པ་པོ། །བྱེ་བ་ཕྲག་ནི་སྟོང་སྟོང་འདུས་པར་འགྱུར། །​མི་ཚེ་ལོ་གྲངས་སྟོང་ཕྲག་བཅུ་གཉིས་ཡིན། །​འཇིག་རྟེན་མཁྱེན་པ་མྱ་ངན་འདས་པ་ཡི། །​དམ་ཆོས་ལོ་གྲངས་སྟོང་དུ་གནས་པར་འགྱུར། །​རྒྱལ་བའི་སྐུ་གདུང་མཆོད་རྟེན་དཔག་ཚད་ནི། །​སུམ་ཅུ་པ་གཅིག་གསེར་གྱིས་སྤྲ་བར་བྱས། །​དེ་བཞིན་གཤེགས་པ་ཆོས་ཀྱི་མཛོད་དག་གི། །​སྐྱེ་བའི་ཡུལ་ནི་ཡེ་ཤེས་འོད་ཅེས་བྱ། །​རིགས་ནི་བྲམ་ཟེ་ཡིན་ཏེ་འོད་དཔག་ཚད། །​ཉི་ཤུ་རྩ་གཉིས་ཡབ་ནི་ལེགས་སྤོང་ཡིན། །​མཛོད་མཆོག་མ་ཞེས་བྱ་བ་རྒྱལ་བའི་ཡུམ། །​སྲས་པོ་རྒྱལ་སྲས་དྲང་སྲོང་རིམ་གྲོ་པ། །​དྲང་སྲོང་མཐུ་རྩལ་ཅན་ནི་མཁས་པ་སྟེ། །​འཇིགས་པ་མེད་པའི་ཡེ་ཤེས་རྫུ་འཕྲུལ་ཅན། །​འདུས་པ་ལན་གྲངས་བཅུ་དྲུག་ཀུན་ལ་ཡང་། །​ལུས་སྦྱངས་ཆགས་པ་མེད་པར་གྱུར་པ་པོ། །​དགྲ་བཅོམ་ཐེར་འབུམ་ཐེར་འབུམ་ཚང་བར་ཡོད། །​མི་ཚེ་ལོ་གྲངས་ཉི་ཁྲི་ཆིག་སྟོང་ཡིན། །​མྱ་ངན་འདས་པ་དེ་ཡི་དམ་ཆོས་དག །​ལོ་གྲངས་བདུན་ཁྲིའི་བར་དུ་གནས་པར་འགྱུར། །​རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །​དཔག་ཚད་ལྔ་པ་ཀུན་ནས་མཛེས་པར་བྱས། །​འཇིག་རྟེན་མགོན་པོ་བློ་གྲོས་བཟང་པོ་ཡི། །​སྐྱེ་བའི་ཡུལ་ནི་བློ་གྲོས་བཀོད་ཅེས་བྱ། །​རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །​དཔག་ཚད་གསུམ་ཡོད་ཡབ་ནི་བློ་གྲོས་ཅན། །​བློ་གྲོས་ཆེན་མོ་རྒྱལ་ཡུམ་ཀུན་གྱིས་བཀུར། །​སྲས་ཡིན་བློ་གྲོས་དབང་པོ་རིམ་གྲོ་པ། །​ཡོན་ཏན་མཆོད་རྟེན་ཞེས་བྱ་མཁས་པ་སྟེ། །​ཕྱོགས་གསལ་བ་ཞེས་བྱ་བ་རྫུ་འཕྲུལ་ཅན། །​འདུས་པ་ལན་གྲངས་བརྒྱད་ཅུ་ཀུན་ལ་ཡང་། །​ཆགས་མེད་

eKangyur, UT4CZ5369-I1KG9171-0000, page 403 (202a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14257#UT22084-045-001-14257