བསྐལ་པ་བཟང་པོ།

The Good Eon
F.197.a

Bhadra­kalpika
F.197.a, volume 45, Degé Kangyur

ལོ་གྲངས་དག་ནི་ལྔ་ཁྲི་ཡིན། །​ཤིན་ཏུ་དུལ་བའི་ཡིད་ལྡན་དམ་ཆོས་དག །​ལོ་གྲངས་སུམ་ཁྲི་སུམ་སྟོང་བར་དུ་གནས། །​རྒྱལ་བའི་སྐུ་གདུང་དག་ནི་རྒྱས་འགྱུར་ལ། །​མཆོད་རྟེན་བཟང་པོ་བྱེ་བ་བདུན་ཅུ་དྲུག །​སངས་རྒྱས་པད་མའི་འོད་ཟེར་སྐྱེ་བའི་ཡུལ། །​མེ་ཏོག་དག་གིས་རྣམ་པར་བརྒྱན་ཞེས་བྱ། །​རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །​དཔག་ཚད་གསུམ་ཡོད་པད་མ་བཟང་པོ་ཡབ། །​དགའ་བ་སྦྱངས་ཞེས་བྱ་བ་རྒྱལ་བའི་ཡུམ། །​སྲས་པོ་པད་མ་ཡིད་འཐད་རིམ་གྲོ་པ། །​མེ་ཏོག་དགའ་ཞེས་བྱ་བ་མཁས་པ་སྟེ། །​ཡེ་ཤེས་མེ་ཏོག་ལེགས་རྒྱས་རྫུ་འཕྲུལ་ཅན། །​འདུས་པ་ལན་གྲངས་བཞི་སྟེ་ཀུན་ལ་ཡང་། །​དགྲ་བཅོམ་དབང་པོ་ཚང་བའི་བསམ་གཏན་པ། །​ཐེར་འབུམ་ཕྲག་ནི་དྲུག་དྲུག་འབྱུང་བར་འགྱུར། །​མི་ཚེ་ལོ་གྲངས་སྟོང་ཕྲག་བཅུ་བདུན་ཡིན། །​དམ་པའི་ཆོས་དག་ལོ་གྲངས་སྟོང་ཕྲག་ནི། །​དགུ་བཅུ་རྩ་ལྔའི་བར་དུ་གནས་པར་འགྱུར། །​རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །​དཔག་ཚད་བཅུ་དྲུག་པ་ལ་མུ་ཏིག་སྤྲས། །​རྣམ་པར་འདྲེན་པ་བརྟུལ་ཞུགས་བཟང་པོ་ཡི། །​སྐྱེ་ཡུལ་ཡེ་ཤེས་རྣམ་པར་ངེས་ཞེས་བྱ། །​རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །​དཔག་ཚད་དགུ་ཡོད་ཡབ་ནི་རྣམ་དག་ཡིན། །​ཐོས་པའི་འོད་ནི་རྒྱལ་ཡུམ་སྲས་པོ་ནི། །​མཛེས་ལྡན་ཤིན་ཏུ་མཛེས་པ་རིམ་གྲོ་པ། །​སྐྱེ་བོས་མཆོད་ཅེས་བྱ་བ་མཁས་པ་སྟེ། །​ཐོགས་པ་མེད་པར་སྟོན་པ་རྫུ་འཕྲུལ་ཅན། །​འདུས་པ་ལན་གྲངས་དགུ་སྟེ་ཀུན་ལ་ཡང་། །​པད་མཚུངས་སྲིད་པ་ཀུན་ལས་རྣམ་གྲོལ་བ། །​བྱེ་བ་ཕྲག་ནི་དགུ་བཅུ་དགུ་དགུ་ཡོད། །​མི་ཚེ་ལོ་གྲངས་དགུ་ཁྲི་ཉིས་སྟོང་ཡིན། །​མྱ་ངན་འདས་པར་ཕྱིན་པའི་དམ་ཆོས་དག །​ལོ་གྲངས་བརྒྱད་ཁྲི་དགུ་སྟོང་བར་དུ་གནས། །​རྒྱལ་བའི་སྐུ་གདུང་དག་ནི་རྒྱས་འགྱུར་ལ། །​མཆོད་རྟེན་བྱེ་བ་སྟོང་ཕྲག་བརྒྱད་ཅུ་འབྱུང་། །​དེ་བཞིན་གཤེགས་པ་སྒྲོན་མའི་རྒྱལ་པོ་ཡི། །​སྐྱེ་བའི་ཡུལ་ནི་ལྷ་ཡི་འོད་ཅེས་བྱ། །​རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །​དཔག་ཚད་གསུམ་ཡོད་ཡབ་ནི་ལེགས་སྐྱེས་ཡིན། །​མེ་ཏོག་ཅན་ཞེས་བྱ་བ་རྒྱལ་བའི་ཡུམ། །​སྲས་པོ་སྐར་མ་སྐར་བཟངས་རིམ་གྲོ་པ། །​སྣང་བའི་རྒྱ་མཚོ་ཞེས་བྱ་མཁས་པ་སྟེ། །​གཡོ་བ་མེད་

eKangyur, UT4CZ5369-I1KG9171-0000, page 393 (197a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14247#UT22084-045-001-14247