བསྐལ་པ་བཟང་པོ།

The Good Eon
F.94.a

Bhadra­kalpika
F.94.a, volume 45, Degé Kangyur

པ་དེ་ནི་བསམ་གཏན་གྱིའོ། །​བསྟན་པ་དང་བྲལ་བར་དགའ་ཞིང་དང་བ་ཙམ་གྱིས་མཐར་གྱིས་ཡོངས་སུ་མྱ་ངན་ལས་འདའ་བར་འགྱུར་བ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་བསྟན་པ་རྣམ་པར་དབྱེ་བའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་རིང་བསྲེལ་རྣམ་པར་དབྱེ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། རིང་བསྲེལ་རྣམས་ལ་ཡོ་བྱད་ཀྱིས་མཆོད་པ་གང་ཡིན་པ་དེ་ནི་སྦྱིན་པའི་ཕ་རོལ་ཏུ་ཕྱིན་པའིའོ། །​སྐྱེ་བོ་མང་པོ་དད་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །​རིང་བསྲེལ་གྱི་མཆོད་རྟེན་གཟི་བྱིན་ཅན་གང་ཡིན་པ་དེ་ནི་བཟོད་པའིའོ། །ལྷ་དང་མི་རྣམས་དགའ་བ་གང་ཡིན་པ་དེ་ནི་བརྩོན་འགྲུས་ཀྱིའོ། །​རིང་བསྲེལ་གྱི་དམིགས་པ་ལས་སངས་རྒྱས་རྗེས་སུ་དྲན་པ་རབ་ཏུ་ཐོབ་པ་གང་ཡིན་པ་དེ་ནི་བསམ་གཏན་གྱིའོ། །​རིང་བསྲེལ་ཚོལ་བས་སྤོབས་པ་ཡོངས་སུ་མ་ཉམས་པ་ཐོབ་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྟེ། འདི་དག་ནི་རིང་བསྲེལ་རྣམ་པར་དབྱེ་བའི་ཕ་རོལ་ཏུ་ཕྱིན་པ་དྲུག་གོ། །​དེ་དག་ལས་ཕ་རོལ་ཏུ་ཕྱིན་པ་ཉིས་སྟོང་ཆིག་བརྒྱ་ནི་འདོད་ཆགས་སྤྱོད་པ་རྣམས་ལ་ཆོས་སྟོན་པའོ། །​ཕ་རོལ་ཏུ་ཕྱིན་པ་ཉིས་སྟོང་ཆིག་བརྒྱ་ནི་ཞེ་སྡང་སྤྱོད་པ་རྣམས་ལ་ཆོས་སྟོན་པའོ། །ཕ་རོལ་ཏུ་ཕྱིན་པ་ཉིས་སྟོང་ཆིག་བརྒྱ་ནི་གཏི་མུག་སྤྱོད་པ་རྣམས་ལ་ཆོས་སྟོན་པའོ། །​ཕ་རོལ་ཏུ་ཕྱིན་པ་ཉིས་སྟོང་ཆིག་བརྒྱ་ནི་ཆ་མཉམ་པར་སྤྱོད་པ་རྣམས་ལ་ཆོས་སྟོན་པ་སྟེ། དེ་དག་ནི་ཕ་རོལ་ཏུ་ཕྱིན་པ་བརྒྱད་སྟོང་བཞི་བརྒྱའོ། །​དེ་དག་གི་ཏིང་ངེ་འཛིན་ཀྱང་བརྒྱད་སྟོང་བཞི་བརྒྱའོ། །​དེ་དག་གི་རྣམ་པ་ལ་འཇུག་པ་ཡང་སྟོང་སྟོང་སྟེ། རྣམ་པ་བརྒྱ་བརྒྱ་པོ་རེ་རེའི་སྟོང་སྟོང་པོ་དེས་ན་དེ་དག་ནི་ཕ་རོལ་ཏུ་ཕྱིན་པ་བརྒྱད་ཁྲི་བཞི་སྟོང་ཞེས་བྱའོ། །​དེ་དག་གི་ཏིང་ངེ་འཛིན་བརྒྱད་ཁྲི་བཞི་སྟོང་སྒྲུབ་པར་བྱེད་པ་ནི་བདག་ལ་ཕན་པར་བརྩོན་པ་ཞེས་བྱའོ། །​གཟུངས་བརྒྱད་ཁྲི་བཞི་སྟོང་ནི་གཞན་ལ་ཕན་པར་བརྩོན་པ་སྟེ། ཐམས་ཅད་མཁྱེན་པ་ཉིད་ཀྱི་ཕྱིར་དེ་ནི་སངས་རྒྱས་ཀྱི་བྱང་ཆུབ་བོ། །​མཆོག་ཏུ་དགའ་བའི་རྒྱལ་པོ་ངས་བྱང་ཆུབ་ཀྱི་སྙིང་པོར་བདུད་བཏུལ་ཏེ། བྱང་ཆུབ་མངོན་པར་རྫོགས་པར་སངས་རྒྱས་ནས་ང་

eKangyur, UT4CZ5369-I1KG9171-0000, page 187 (94a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14041#UT22084-045-001-14041