བསྐལ་པ་བཟང་པོ།

The Good Eon
F.93.a

Bhadra­kalpika
F.93.a, volume 45, Degé Kangyur

ཕ་རོལ་ཏུ་ཕྱིན་པ་དྲུག་གོ། །​དེ་ལ་སྤྱོད་ལམ་གྱི་ཕ་རོལ་ཏུ་ཕྱིན་པ་དྲུག་གང་ཞེ་ན། །​སྐྱེ་བོ་མང་པོ་དད་པར་བྱེད་པའི་སྤྱོད་ལམ་གང་ཡིན་པ་དེ་ནི་སྦྱིན་པའིའོ། །​ཀུན་ནས་མཛེས་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །​རྒྱུན་མི་འཆད་པར་བལྟས་པ་གང་ཡིན་པ་དེ་ནི་བཟོད་པའིའོ། །​གོམ་པ་འདོར་བ་གང་ཡིན་པ་དེ་ནི་བརྩོན་འགྲུས་ཀྱིའོ། །​སྤྱོད་ལམ་མ་ཉམས་པ་གང་ཡིན་པ་དེ་ནི་བསམ་གཏན་གྱིའོ། །​སྤྱོད་ལམ་མ་བཅོས་པ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་སྤྱོད་ལམ་གྱི་ཕ་རོལ་ཏུ་ཕྱིན་པ་དྲུག་གོ། །​དེ་ལ་ཕན་པར་འདོད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྤྱོད་པ་ཡང་བར་ཟང་ཟིང་ལེན་པ་གང་ཡིན་པ་དེ་ནི་སྦྱིན་པའིའོ། །​སེམས་ཅན་མ་རུངས་པ་དག་ལ་སྐྱབས་བྱེད་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །​མུ་སྟེགས་ཅན་རྣམས་ཀྱི་གནོད་པ་བཟོད་པ་གང་ཡིན་པ་དེ་ནི་བཟོད་པའིའོ། །​འདི་ལྟར་གདུལ་བའི་ཕྱིར་དགའ་བོ་ལྷའི་ནང་དུ་སོན་པ་དང་། འདི་ལྟར་པད་མའི་སྙིང་པོའི་ལྟ་བུ་གང་ཡིན་པ་དེ་ནི་བརྩོན་འགྲུས་ཀྱིའོ། །​གདུལ་བའི་ཕྱིར་བཟང་བརྩམས་སྒོམ་པ་ལྟ་བུ་གང་ཡིན་པ་དེ་ནི་བསམ་གཏན་གྱིའོ། །​འདི་ལྟར་ལྔ་པོའི་ནང་ནས་ཀུན་ཤེས་སྙིང་རྗེས་ཉེ་བར་འོངས་ཏེ་ཆོས་བསྟན་པ་དང་། འདི་ལྟར་བདེན་པ་པོའི་ལྟ་བུ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་ཕན་པར་འདོད་པའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་ཉོན་མོངས་པ་མེད་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཉོན་མོངས་པས་ཡོངས་སུ་སྐྱོ་བ་མེད་པ་གང་ཡིན་པ་དེ་ནི་སྦྱིན་པའིའོ། །​དབང་རབ་ཏུ་ཐོབ་པ་གང་ཡིན་པ་དེ་ནི་ཚུལ་ཁྲིམས་ཀྱིའོ། །​གནོད་སེམས་མེད་པར་གནས་པ་གང་ཡིན་པ་དེ་ནི་བཟོད་པའིའོ། །​མོས་པ་ལ་ཡོན་སྦྱོང་བ་གང་ཡིན་པ་དེ་ནི་བརྩོན་འགྲུས་ཀྱིའོ། །​མངོན་པར་ཞེན་པ་མེད་པར་རྟག་ཏུ་སྦྱོར་བ་གང་ཡིན་པ་དེ་ནི་བསམ་གཏན་གྱིའོ། །​ཇི་ལྟར་འདོད་པ་བཞིན་གནས་པ་གང་ཡིན་པ་དེ་ནི་ཤེས་རབ་ཀྱི་སྟེ། འདི་དག་ནི་ཉོན་མོངས་པ་མེད་པའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་ཚེའི་འདུ་བྱེད་འདོར་བ་ལ་དབང་སྒྱུར་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། ཚེ་འདོར་བ་གང་ཡིན་པ་དེ་ནི་སྦྱིན་པའིའོ། །

eKangyur, UT4CZ5369-I1KG9171-0000, page 185 (93a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh94/UT22084-045-001-14039#UT22084-045-001-14039