ཚོང་དཔོན་བཟང་སྐྱོང་གིས་ཞུས་པ།

The Questions of Bhadrapāla the Merchant
F.83.a

Bhadra­pāla­śreṣṭhi­paripṛcchā
F.83.a, volume 44, Degé Kangyur

ནས་ཀྱང་སྨན་ཆེན་དད་པ་སྐྱེས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་བདག་ནི་ཆོས་འཚལ་བ་ལགས་ན་བདེ་བར་གཤེགས་པས་བདག་ལ་ཆོས་བསྟན་དུ་གསོལ། བསྐལ་པའི་མཐར་མ་ཐུག་པར་ཡོངས་སུ་མྱ་ངན་ལས་འདས་པར་གཤེགས་པ་ཞིག་ཏུ་གྱུར་ན། དེའི་སླད་ན་སེམས་ཅན་འདི་དག་གིས་ལས་དགེ་བ་དང་མི་དགེ་བ་རྣམས་ཀྱི་རྣམ་པར་སྨིན་པ་མ་འཚལ་ཏེ། འཁོར་བ་ན་ཡོངས་སུ་འཁྱམ་པར་འགྱུར་དུ་མཆིའོ། །​བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་ངས་ཚིགས་སུ་བཅད་པ་ཕྱེད་ཀྱི་དོན་གྱི་ཕྱིར་ཡང་བྲག་གི་རྩེ་མོ་ནས་རང་གི་ལུས་བོར་ཏེ་དཀའ་བ་རྣམ་པ་བརྒྱ་སྟོང་དུ་མ་ཉམས་སུ་མྱོང་ངོ་། །​སྨན་ཆེན་ཁྱོད་ཅི་དང་ཅི་འདོད་པ་དྲིས་ཤིག་དང་ངས་ཁྱོད་ལ་ལན་གདབ་བོ། །​དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་སྨན་ཆེན་གྱིས་འདི་སྐད་ཅེས་གསོལ་ཏོ། །​བཅོམ་ལྡན་འདས་རྣམ་པར་ཤེས་པ་འདིའི་རང་བཞིན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། སྨན་ཆེན་སྒྱུ་མ་མཁན་གྱི་མིའི་རང་བཞིན་གང་ཡིན་པ་དང་། མིའི་གྲིབ་མ་ཆུའི་ནང་དུ་འབྱུང་བ་གསལ་བ་མ་ཡིན་ཞིང་མི་གསལ་བའི་རང་བཞིན་གང་ཡིན་པ་དང་། མིག་དང་ནམ་མཁའི་རང་བཞིན་གང་ཡིན་པ་དང་། སྲེད་པའི་རང་བཞིན་གང་ཡིན་པ་བཞིན་ནོ། །​སྨན་ཆེན་གྱིས་གསོལ་པ། བཅོམ་ལྡན་འདས་སྲེད་པའི་རང་བཞིན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། སྙིང་དུ་སྡུག་པའི་མི་མཐོང་བ་ན་མིག་གི་དབང་པོ་འཕོ་བ་དང་། ཇི་ལྟར་མིས་མེ་ལོང་ལ་རང་གི་བཞིན་གྱི་གཟུགས་བརྙན་མཐོང་ལ། མེ་ལོང་གུད་དུ་ཕྱུང་ན་རང་གི་བཞིན་གྱི་གཟུགས་བརྙན་མི་མཐོང་བ་དེ་བཞིན་དུ་རྣམ་པར་ཤེས་པའི་ཁམས་འདི་འཕོས་ན་རང་གི་བསོད་ནམས་དང་། བསོད་ནམས་མ་ཡིན་པ་རྣམ་པར་ཤེས་པའི་ཁམས་དེས་མཐོང་ངོ་། །​དཔེར་ན་མི་དམུས་ལོང་གིས་ཉི་མ་འཆར་བ་འམ། ཉི་མ་གུང་ན་འདུག་པ་ཡང་མི་མཐོང་ལ། མཚན་མོ་ཡང་ཟླ་བ་འཆར་བ་དང་ནུབ་པ་མི་མཐོང་བ་དེ་བཞིན་དུ་རྣམ་པར་ཤེས་པའི་ཁམས་འདི་ཡང་ལུས་ལ་མི་སྣང་ངོ་།

eKangyur, UT4CZ5369-I1KG9170-0000, page 165 (83a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh83/UT22084-044-003-259#UT22084-044-003-259