The Perfection of Wisdom in One Hundred Thousand Lines
F.331.a
།བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གང་དུ་བཞག་པར་སྣང་བ་ཆེན་པོ་བྱུང་བར་རིགས་ཀྱི་བུ་འམ་རིགས་ཀྱི་བུ་མོས་མཐོང་ན། རིགས་ཀྱི་བུ་འམ་རིགས་ཀྱི་བུ་མོ་དེས་འདིར་ནི་ལྷ་མཐུ་བོ་ཆེ་མཐུ་ཆེན་པོ་རྫུ་འཕྲུལ་ཆེ་བ། དབང་ཆེ་བ། གཟི་བརྗིད་ཆེ་བ་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཀླག་པ་དང་། བཅང་བ་དང་། ཀུན་ཆུབ་པར་བྱ་བ་དང་། ཕྱག་བྱ་བ་དང་། གདུད་པར་བྱ་བ་དང་། རིམ་གྲོར་བྱ་བ་དང་། བཀུར་བསྟིར་བྱ་བ་དང་། ཕུ་དུད་དུ་བྱ་བ་དང་། མཆོད་པའི་ཕྱིར་ལྷགས་སོ་ཞེས་བྱ་བ་ངེས་པར་ཁོང་དུ་ཆུད་པར་བྱའོ། །ཀཽ་ཤི་ཀ་གཞན་ཡང་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་གཙང་སྦྲའི་སྤྱོད་པ་དང་ལྡན་ན། དེའི་གཙང་སྦྲའི་སྤྱོད་པ་དེས་ལྷ་དེ་དག་ཀྱང་ཉེ་བར་འོངས་ཤིང་། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཀླག་པ་དང་། གཟུང་བ་དང་། ཀུན་ཆུབ་པར་བྱ་བ་དང་། རིམ་གྲོར་བྱ་བ་དང་། བཀུར་སྟིར་བྱ་བ་དང་། ཕུ་དུད་དུ་བྱ་བ་དང་། མཆོད་པ་བྱས་ནས། ཤིན་ཏུ་དགའ་བའི་ཡིད་དུ་འགྱུར་རོ། །གནས་དེ་ན་ལྷ་མཐུ་ཆུང་ངུ་ཇི་སྙེད་ཅིག་གནས་པ་དེ་དག་ཀྱང་ལྷ་མཐུ་བོ་ཆེ་མཐུ་ཆེན་པོ་དེ་དག་གི་གཟི་བརྗིད་དང་དཔལ་དང་ཟིལ་མྱི་བཟོད་པའི་ཕྱིར་གནས་དེ་ནས་གུད་དུ་འདོང་བར་སེམས་སོ། །ཇི་ལྟ་ཇི་ལྟར་ལྷ་མཐུ་ཆེན་པོ་མཐུ་ཆེན་པོ་རྫུ་འཕྲུལ་ཆེ་བ། དབང་ཆེ་བ། གཟི་བརྗིད་ཆེ་བ། དེ་དག་ཉེ་བར་འོང་བར་སེམས་པ་དེ་ལྟ་དེ་ལྟར་རིགས་ཀྱི་བུ་འམ་རིགས་ཀྱི་བུ་མོ་དེ་ཡང་མོས་པ་རྒྱ་ཆེན་པོ་དང་ལྡན་པར་འགྱུར་རོ། །དེའི་གནས་ཀྱི་འཁོར་ཀུན་ཏུ་ཡང་གཙང་སྦྲ་བྱེད་པའི་སྤྱོད་པ་མྱི་རྒྱུ་བར་བྱས་ཏེ། རིགས་ཀྱི་བུ་འམ་རིགས་ཀྱི་བུ་མོ་དེས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མཆོད་པའི་ལས་ཀྱི་ཕྱིར། དེའི་འཁོར་ཀྱིས་ཡང་སྤོས་ཆུའི་ཆག་ཆག་གིས་གདབ་བོ། །མེ་ཏོག་དང་། སྤོས་ཀྱིས་གཏོར་ཏོ། །བདུག་སྤོས་འཐུལ་བའི་སྣོད་བཞག་གོ
eKangyur, UT4CZ5369-I1KG9144-0000, page 661 (331a).
About the eKangyur
The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.
Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.
The English translation of this folio by 84000 Translating the words of the Buddha can be found at:
https://read.84000.co/translation/toh8/UT22084-014-001-96866#UT22084-014-001-96866