The Perfection of Wisdom in One Hundred Thousand Lines
F.304.b

ལྷའི་དབང་པོ་བརྒྱ་བྱིན་གྱིས་ཇི་ལྟ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གསལ་བར་བརྗོད་པ་དེ་ལྟ་དེ་ལྟར་བདུད་སྡིག་ཏོ་ཅན་དེ་དག་ལམ་དེ་ཉིད་དང་། སྒོ་དེ་ཉིད་ནས་ཕྱིར་ལོག་གོ །​དེ་ནས་འཁོར་དེ་ན་རྒྱལ་ཆེན་བཞིའི་རིས་ཀྱི་ལྷའི་བུ་དང་། འོག་མྱིན་གྱི་ལྷའི་བར་དུ་ཇི་སྙེད་ཅིག་འཁོད་པ་དེ་དག་གིས་ལྷ་རྫས་ཀྱི་མེ་ཏོག་དང་། ན་བཟའ་མང་པོ་མངོན་པར་སྤྲུལ་ནས། བར་སྣང་གི་ནམ་མཁའ་ལ་འཁོད་བཞིན་དུ་བཅོམ་ལྡན་འདས་གང་ན་བ་དེར་གཏོར་ཏེ། བཅོམ་ལྡན་འདས་གང་ན་བ་དེར་མངོན་པར་གཏོར་ནས། ཚིག་འདི་སྐད་དུ་བརྗོད་དོ། །​འཛམ་བུའི་གླིང་གི་མྱི་འདི་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཡུན་རིང་པོར་སྤྱོད་པར་གྱུར་ཅིག །​འཛམ་བུའི་གླིང་གི་མྱི་འདི་དག་ཇི་སྲིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་སྲིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ནུབ་པར་མྱི་འགྱུར་ལ། དམ་པའི་ཆོས་ཀྱང་ཡུན་རིང་དུ་གནས་ཤིང་། དགེ་འདུན་དཀོན་མཆོག་ཀྱང་འཇིག་རྟེན་དུ་འབྱུང་བར་འགྱུར་ཞེའོ། །​འཛམ་བུའི་གླིང་གི་མྱི་རྣམས་ཇི་སྲིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱོད་པ་དེ་སྲིད་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང་། ཕྱོགས་བཅུ་ཀུན་གྱི་འཇིག་རྟེན་གྱི་ཁམས་ཀྱི་བར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ནུབ་པར་མྱི་འགྱུར་ལ། དམ་པའི་ཆོས་ཀྱང་ཡུན་རིང་དུ་གནས་ཤིང་། དགེ་འདུན་དཀོན་མཆོག་ཀྱང་འཇིག་རྟེན་དུ་འབྱུང་བར་འགྱུར་འགྱུར་ཞེའོ། །​བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་པ་ཁྱད་པར་དུ་འཕགས་པ་ཡང་ཡོད་པར་འགྱུར་ཞེའོ། །​ཕྱོགས་གང་ན་རིགས་ཀྱི་བུ་འམ། རིགས་ཀྱི་བུ་མོ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ཤིང་གླེགས་བམ་དུ་བྱས་ཏེ། འཆང་བའི་ཕྱོགས་དེ་ནི་སྣང་བ་དང་ལྡན་པར་རིག་པར་བྱའོ། །​ཕྱོགས་དེ་ནི་མགོན་དང་བཅས་ཤིང་མུན་པ་དང་བྲལ་བར་རིག་པར་བྱའོ། །​དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་དང་། འོག་མྱིན་གྱི་བར་གྱི་ལྷའི་བུ་དེ་དག་ལ་འདི་སྐད་ཅེས་བཀའ་སྩལ་ཏོ།