འབྱུང་པོ་འདུལ་བའི་རྒྱུད།

The Bhūta­ḍāmara Tantra
F.250.b

Bhūta­ḍāmara­tantram
F.250.b, volume 95, Degé Kangyur

ངེས་པར་འཆི་བར་འགྱུར་རོ། །​འདིས་བརྒྱ་བྱིན་མངག་གཞུག་པར་འགྱུར་ཞིང་པང་ན་གནས་པ་བླངས་ཏེ་སྟེར་བར་བྱེད་དོ། །​གལ་ཏེ་མ་འོངས་ན་སྤྱི་བོ་འགས་ཞིང་དུམ་བུ་བརྒྱར་འཇིག་ལ་རང་གི་རིགས་རྒྱུད་རྣམས་བརླག་པར་འགྱུར་རོ། །​གཞོན་ནུ་མནན་ནས་སྟོང་ཕྲག་བརྒྱད་བཟླས་ན་ཉི་མ་བདུན་ན་མྱུར་དུ་འོང་སྟེ། གཞོན་ནུ་མངག་གཞུག་པར་འགྱུར་རོ། །​གཞོན་ནུའི་གདོན་ཐམས་ཅད་བྲན་དུ་འགྱུར་ཞིང་ཆེ་གེ་མོ་འཚོ་བར་གྱིས་ཤིག །​ཆེ་གེ་མོ་སོད་ཅིག་ཅེས་སྨྲས་ན་དེ་དག་ཐམས་ཅད་བྱེད་དོ། །​ཚོགས་ཀྱི་བདག་པོ་མནན་ཏེ། སྟོང་ཕྲག་བརྒྱད་བཟླས་ན་ཉི་མ་བདུན་ན་མྱུར་དུ་འོང་སྟེ། གལ་ཏེ་མ་འོངས་ན་རིགས་རྒྱུད་བརླག་ཅིང་འཆི་བར་འགྱུར་རོ། །​ལོག་འདྲེན་ཐམས་ཅད་མངག་གཞུག་མར་འགྱུར་རོ། །​ཉི་མ་རྐང་པ་གཡོན་པས་མནན་ཏེ་བརྒྱད་སྟོང་བཟླས་ན་ཉི་མ་བདུན་ན་མྱུར་དུ་འོང་སྟེ་རྒྱལ་སྲིད་སྟེར་རོ། །​གལ་ཏེ་མ་འོངས་ན་འཆི་བའམ་རང་གི་བརྒྱུད་བརླག་པར་འགྱུར་རོ། །​ཟླ་བ་མནན་ཏེ་བརྒྱད་སྟོང་བཟླས་ན་ཉི་མ་བདུན་ན་མྱུར་དུ་འོང་ཞིང་མངག་གཞུག་པར་འགྱུར་ལ་གསེར་སྲང་བརྒྱ་སྟེར་རོ། །​གལ་ཏེ་མ་འོངས་ན་སྤྱི་བོ་འགས་ཤིང་བསྐམས་ཏེ་འཆི་བར་འགྱུར་རོ། །​རང་གི་རིགས་དང་རྒྱུད་ཕུང་བར་ཡང་འགྱུར་རོ། །​འདི་ནི་ཟླ་བ་འཁོར་དུ་བསྒྲུབ་པར་བཤད་པའོ། །​འཇིག་བྱེད་རྐང་པ་གཡོན་པས་མནན་ཏེ། ཉི་མ་བདུན་དུ་སྟོང་ཕྲག་བརྒྱད་བཟླས་ནས་ཡང་མཚན་མོ་མཆོད་པ་ཆེན་པོ་བྱས་ཏེ། ཤ་ཆེན་པོས་མཆོད་པ་བྱས་ནས་ཤ་ཆེན་པོའི་གཏོར་མ་བྱས་ཏེ་ཤ་ཆེན་པོ་ཉིད་དང་ཏིལ་གྱིས་མར་མེ་རབ་ཏུ་སྦར་ཏེ། ནམ་ཕྱེད་ན་སྒྲ་ཆེན་པོ་བྱུང་སྟེ་དྲག་དུ་རྒོད་ཅིང་བསྡད་ནས། ཀྱེ་སྐྱེས་བུ་ཆེན་པོ་འདི་བཟའ་ཡིས་སློངས་ཤིག་ཅེས་ཟེར་རོ། །​དེས་སྐྲག་པར་མི་བྱའོ་སྟེ། གལ་ཏེ་སྐྲག་པར་གྱུར་ན་ཡི་གེ་ཧཱུྃ་བཟླས་ན་བདེ་བར་གནས་པར་འགྱུར་རོ། །​འཇིགས་བྱེད་འཁོར་དང་བཅས་པ་བྲན་དུ་འགྱུར་རོ། །​ཁམས་གསུམ་པའི་རྒྱལ་སྲིད་སྟེར་ཞིང་ཡི་གེ་ཧཱུྃ་བཟླས་པ་ཙམ་གྱིས་འཇིག་རྟེན་པའི་ལྷ་ཐམས་ཅད་འཇོམས་སོ། །​གར་གྱི་དབང་ཕྱུག་རྐང་པ་གཡོན་པས་མནན་ཏེ། ཉི་མ་བདུན་དུ་བརྒྱད་སྟོང་བཟླས་ན་སྐད་ཅིག་དེ་ལ་འོང་ཞིང་མངག་གཞུག་

eKangyur, UT4CZ5369-I1KG9221-0000, page 500 (250b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh747/UT22084-095-002-2078#UT22084-095-002-2078