The Teaching on the Effulgence of Light
F.202.a

དེ་དག་ཐམས་ཅད་གུས་པས་ནི། །​བཅོམ་ལྡན་དེ་ལ་རབ་ཏུ་ཕུལ། །​སྐྱེད་མོས་ཚལ་ནི་དེ་དག་ཏུ། །​འཆག་ས་དག་ནི་ཇི་སྙེད་པ། །​དེ་དག་ཐམས་ཅད་ཀུན་དུ་ནི། །​ལྗོན་ཤིང་ཙམ་པ་ཀ་དག་དང་། །​ལྗོན་ཤིང་ནྱ་གྲོ་དྷ་དག་དང་། །​ལྗོན་ཤིང་ཀིང་ཤུ་ཀ་དང་ནི། །​ལྗོན་ཤིང་ཨུ་དུམ་བ་ར་དང་། །​ལྗོན་ཤིང་པ་ལ་པ་ཏྲ་དང་། །​ལྗོན་ཤིང་ཤི་རི་ཤ་དག་དང་། །​ལྗོན་ཤིང་མྱ་ངན་ཚལ་ལ་སོགས། །​དེ་དག་གྲངས་ནི་སོ་སོར་ཡང་། །​བྱེ་བ་ཕྲག་ནི་བརྒྱད་ཅུ་ཡོད། །​ལྗོན་ཤིང་མང་པོ་དེ་དག་ཀྱང་། །​དབྱར་དང་དགུན་ནི་འདྲ་བར་ཡང་། །​མེ་ཏོག་འབྲས་བུ་ཡལ་ག་དག །​ཁ་དོག་དག་ནི་གསལ་ཞིང་རྒྱས། །​དྲི་མཆོག་དམ་པ་རབ་འབྱུང་ཞིང་། །​དེ་བཞིན་གཤེགས་པའི་སྐུ་ལ་འཐུལ། །​དགེ་སློང་དག་ནི་ཇི་སྙེད་པ། །​ལུས་ཀྱི་ཁ་དོག་གསེར་དང་འདྲ། །​དེ་དག་ཐམས་ཅད་ཀུན་ཀྱང་ནི། །​ལྗོན་ཤིང་དག་ནི་དེ་དྲུང་དུ། །​འདུག་ནས་རབ་ཏུ་བརྩོན་པས་ན། །​གཟུངས་ནི་རབ་ཏུ་ཐོབ་པར་གྱུར། །​དེ་ཚེ་དེ་བཞིན་གཤེགས་པ་དེ། །​རྒྱལ་པོ་ཡབ་དང་སྲས་རྣམས་དང་། །​གཞན་ཡང་འཁོར་ནི་མང་པོ་ལ། །​ཤིན་ཏུ་ཐུགས་ནི་བརྩེ་བའི་ཕྱིར། །​རྣམ་པར་ངེས་པའི་འོད་ཟེར་མདོ། །​དེ་དག་ལ་ནི་རབ་ཏུ་བསྟན། །​རྒྱལ་པོ་དེས་ནི་ཐོས་གྱུར་ནས། །​སེམས་ནི་རབ་ཏུ་དགའ་བར་གྱུར། །​ཚིགས་སུ་བཅད་པ་ཚད་མེད་པས། །​དེ་བཞིན་གཤེགས་པའི་བསྔགས་པ་བརྗོད། །​གཞན་ཡང་རྒྱལ་པོ་ཆེན་པོ་དེས། །​རིན་པོ་ཆེ་ཡི་གདུགས་དམ་པ། །​བྱེ་བ་ཕྲག་ནི་བརྒྱད་ཅུ་སྙེད། །​བཅོམ་ལྡན་དེ་ལ་རབ་ཏུ་ཕུལ། །​རིན་ཆེན་གདུགས་ནི་རེ་རེ་ལ། །​ཡིད་བཞིན་ནོར་བུའི་དྲ་བ་དག །​མཐའ་མ་འཁོར་བར་རབ་ཏུ་བརྒྱན། །​ཡིད་བཞིན་ནོར་བུ་རིན་པོ་ཆེ། །​དེ་དག་རེ་རེའི་རིན་ཐང་ཡང་། །​འཛམ་བུའི་གསེར་ནི་བཙོ་མ་དག །​སྲང་ནི་བྱེ་བ་བརྒྱད་ཅུ་རི། །​རིན་ཆེན་གདུགས་ནི་རེ་རེ་ཡང་། །​ཡིད་བཞིན་ནོར་བུ་རིན་པོ་ཆེ། །​བྱེ་བ་ཕྲག་ནི་བརྒྱད་ཅུ་སྙེད། །​ཕྲེང་བ་དག་ཏུ་བྱས་པར་གྱུར། །​ཡིད་བཞིན་རིན་ཆེན་དེ་དག་ཀྱང་། །​ཁ་དོག་དག་ནི་རབ་གསལ་བས། །​ཉིན་མཚན་དག་ནི་མེད་པར་ཡང་། །​རྟག་ཏུ་འོད་ཟེར་རབ་ཏུ་གཏོང་། །​འོད་ཟེར་དེ་དག་རེ་རེས་ཀྱང་། །​དཔག་ཚད་བརྒྱ་ནི་སྣང་བར་བྱེད། །​འོད་ཟེར་དེ་དག་རབ་གསལ་བས། །