དཔའ་བོ་གཅིག་པུ་གྲུབ་པའི་རྒྱུད།

The Tantra of Siddhaikavīra
F.11.b

Siddhaika­vīra­tantram
F.11.b, volume 89, Degé Kangyur

ཉིད་ཀྱི་གཡས་སུ་སྐྲ་ཅན་དང་གཡོན་དུ་ཉེ་བའི་སྐྲ་ཅན་མ་རིན་པོ་ཆེའི་པདྨ་བསྣམས་པ་སྐུ་མདོག་དཀར་མོ་རྣམ་པར་བསམ་མོ། །​མདུན་དུ་ཉི་མའི་འོད་མདོག་དཀར་པོ་ཉི་མའི་དཀྱིལ་འཁོར་ལ་བཞུགས་པ་ཨུཏྤ་ལ་བསྣམས་པ་དང་། རྒྱབ་ཏུ་ཟླ་བའི་འོད་ཟླ་བའི་དཀྱིལ་འཁོར་ལ་བཞུགས་པ་ཨུཏྤ་ལ་བསྣམས་པ་རྣམ་པར་བསམ་པར་བྱའོ། །​དེ་ནས་རང་གི་སྙིང་ག་ལ་འབར་བའི་ཕྲེང་བའི་ཚོགས་ཡོངས་སུ་འཕྲོ་བའི་ཡི་གེ་ཨ་ཡོངས་སུ་བསམས་ལ། དེ་ཡོངས་སུ་གྱུར་པའི་འཁོར་ལོ་རྩིབས་བརྒྱད་པ་ངག་གི་རང་བཞིན་མ་ལུས་པས་རྣམ་པར་སྤྲས་པ། ཡོངས་སུ་གསལ་བར་བྱེད་པ་མྱུར་དུ་འཁོར་བར་བསམ་པར་བྱའོ། །​དེ་ལྟར་གོམས་པར་བྱས་པ་ལས་ཟླ་བ་དྲུག་གིས་སྔོན་མ་ཐོས་པའི་བསྟན་བཅོས་ཐམས་ཅད་ཀྱང་དོན་དང་གཞུང་གི་སྒོ་ནས་མངོན་སུམ་དུ་འགྱུར་ཞིང་། ལོ་གཅིག་གིས་ངག་གི་དབང་ཕྱུག་དང་མཚུངས་པར་འགྱུར་རོ། །​ཨ་ར་པ་ཙ་ནའི་འཁོར་ལོའི་ཆོ་གའོ། །​ཨོཾ་བཱ་གཱི་ཤྭ་རི་མུཾ། སྔགས་འདི་སྔ་མ་བཞིན་དུ་བཟླས་པས། གོང་དུ་སྨོས་པའི་འབྲས་བུ་རྣམས་འབྱིན་པར་འགྱུར་ཏེ། འཁོར་ལོའི་དབུས་སུ་ཡི་གེ་མུཿདམར་པོ་འབར་བའི་ཕྲེང་བའི་ཚོགས་ཅན་བལྟ་བར་བྱའོ། །​ཤེས་རབ་ཀྱི་འཁོར་ལོའི་ཆོ་གའོ། །​ཨོཾ་དྷརྨ་དྷཱ་ཏུ། བཱ་གཱི་ཤྭ་རི་མུཾ་སྭཱ་ཧཱ། སྔར་བཤད་པའི་རིམ་པས་ལྔ་པོའི་བདག་ཉིད་དུ་བསམས་ལ། ཡི་གེ་མུཾ་གྱི་སྙིང་པོ་ཅན་གྱི་འཁོར་ལོ་རྩིབས་བཅུ་དྲུག་པ་རྣམ་པར་བསམ་པར་བྱའོ། །​དེ་ལྟར་རྣམ་པར་བསམས་ན་སྔར་བཤད་པའི་འབྲས་བུ་རྣམས་སྐྱེད་པར་འགྱུར་རོ། །​ཨོཾ་བཛྲ་ཏཱིཀྵྞ་བ་ར་ད་མུཿསྭཱ་ཧཱ། བདག་ཉིད་ཡི་གེ་མུཿཡོངས་སུ་གྱུར་པ་ལས་མེའི་ཕུང་པོ་ལྟ་བུས་ཕྱོགས་ཀྱི་དཀྱིལ་འཁོར་སྣང་བར་བྱེད་པ། ངག་གི་དབང་ཕྱུག་དཔའ་བོ་གཅིག་པུ་གྲུབ་པར་ཡུད་ཙམ་རྣམ་པར་བསམས་ལ། རང་གི་སྙིང་གར་ཡི་གེ་ཨོཾ་ལས་ཡོངས་སུ་གྱུར་པའི་ཉི་མའི་དཀྱིལ་འཁོར་འོད་ཟེར་བརྒྱ་སྟོང་གིས་རྣམ་པར་སྤྲས་པས། འཇིག་རྟེན་གྱི་ཁམས་མ་ལུས་པ་སྣང་བར་བྱེད་པ་རྣམ་པར་བསམས་པར་བྱས་ནས། ཟླ་བ་དྲུག་ཙམ་གྱིས་ངག་གི་དབང་ཕྱུག་དང་མཚུངས་པར་སྐྱེ་ཞིང་། སྔར་སྨོས་པའི་འབྲས་བུ་རྣམས་འདིས་སྐྱེད་པར་འགྱུར་རོ། །

eKangyur, UT4CZ5369-I1KG9215-0000, page 22 (11b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh544/UT22084-089-001-444#UT22084-089-001-444