འཇམ་དཔལ་གྱི་རྩ་བའི་རྒྱུད།

The Root Manual of the Rites of Mañjuśrī
F.141.b

Mañjuśrī­mūla­kalpa
F.141.b, volume 88, Degé Kangyur

ལྔ་པ་ནི་བྱང་ཆུབ་སེམས་དཔའ་ཆེན་པོ་འཕགས་པ་འཇམ་དཔལ་ལའོ། །​དྲུག་པ་ནི་ལྷ་ཐམས་ཅད་ལའོ། །​བདུན་པ་དང་བརྒྱད་པ་ནི་དཀྱིལ་འཁོར་གཉིས་པའི་སྒོ་ཁང་ལ་གཞག་པར་བྱ་སྟེ། །​གཅིག་ནི་འབྱུང་པོ་ཐམས་ཅད་ལའོ། །​གཅིག་ནི་སེམས་ཅན་ཐམས་ཅད་ཀྱི་ཐུན་མོང་དུ་གྱུར་པར་བསྔོས་ནས་གཞག་པར་བྱའོ། །​དེ་བས་ན་སྔར་བཤད་པའི་ཆོ་གས་སྤྱན་དྲང་བར་བྱའོ། །​དེ་བཞིན་དུ་མེ་ཏོག་དང་བདུག་པ་དང་དྲི་དང་། མར་མེ་དང་ལྷ་བཤོས་ཀྱང་སྔར་བསྟན་པ་ཉིད་ཀྱི་ལས་ཀྱིས་དབུལ་བར་བྱ་སྟེ། ཐམས་ཅད་ཀྱི་ཐམས་ཅད་དུ་གོ་རིམས་བཞིན་དུ་བྱའོ། །​མར་མེ་འཛིན་པས་མར་གྱི་མར་མེ་གཟུང་བར་བྱའོ། །​འཕགས་པ་དང་འཕགས་པ་མ་ཡིན་པ་ཐམས་ཅད་ལ་ལྷ་བཤོས་ཞེས་སྨོས་པ་ནི། འབྲས་སཱ་ལུའི་ཆན་ཞོ་དང་བཅས་པ་དང་སྦྲང་རྩི་དང་ལྡན་པའི་འོ་ཐུག་ཁྱད་པར་ཅན་གྱིས་ཉེ་བར་སྦྱར་བའི་མར་ལ་བཙོས་པའི་སྣུམ་ཁུར་གྱི་འབྲེང་བུ་ལ་སོགས་པ་དང་། ཁཎྜ་ལ་སོགས་པའི་བཟའ་བ་ཐམས་ཅད་ནི་དེ་བཞིན་གཤེགས་པ་རྣམས་ལ་དབུལ་བར་བྱའོ། །​མར་གྱིས་གང་བ་དང་ཙནྡན་གྱི་ཐང་ཆུ་སྦྲང་རྩིའི་སྙིང་པོ་དང་འོ་མར་བཙོས་པའི་བཟའ་བ་ནི་རང་སངས་རྒྱས་ཐམས་ཅད་དང་། འཕགས་པ་ཉན་ཐོས་དང་བྱང་ཆུབ་སེམས་དཔའ་ཆེན་པོ་དང་འཕགས་པའི་ལྷ་ཐམས་ཅད་ལ་དབུལ་བར་བྱའོ། །​དེ་བཞིན་དུ་གརྦྷོད་ཨུ་ལོ་པི་ཀ་རི་ཀ་དང་། ཁྱད་པར་དུ་སྣུམ་ཁུར་གྱི་ཡོ་བྱད་འབྱུང་པོ་ཐམས་ཅད་དང་། སེམས་ཅན་ཐམས་ཅད་ལ་སྔགས་དང་ལྡན་པའི་ཆོ་གས་སྦྱིན་པར་བྱའོ། །​དེ་བཞིན་དུ་མེ་ཏོག་དྲི་ཞིམ་པ་སྣ་མའི་མེ་ཏོག་དང་རྒྱ་སྤོས་དང་། ཀླུའི་མེ་ཏོག་དང་མེ་ཏོག་པུན་ནཱ་ག་ལ་སོགས་པ་སྔར་བསྟན་པ་སངས་རྒྱས་དང་། རང་སངས་རྒྱས་ཐམས་ཅད་དང་འཕགས་པ་ཉན་ཐོས་དང་། བྱང་ཆུབ་སེམས་དཔའ་ཆེན་པོ་དང་འཕགས་པ་དང་འཕགས་པ་མ་ཡིན་པའི་ལྷ་ཐམས་ཅད་ལ་དབུལ་བར་བྱའོ། །​ཁྱད་པར་དུ་ནི་དེ་བཞིན་གཤེགས་པའི་རིགས་ལ་ནི་སྣ་མའི་མེ་ཏོག་དང་། པདྨའི་རིགས་ལ་ནི་མེ་ཏོག་པདྨ་དང་། དེ་བཞིན་དུ་རྡོ་རྗེའི་རིགས་ལ་ནི་མེ་ཏོག་ཨུཏྤལ་དང་། ལྷ་གཞན་དག་ལ་ནི་གཞན་གང་ཡང་རུང་བས་དབུལ་བར་བྱའོ། །​ག་པུར་གྱི་བདུག་པ་ནི་དེ་བཞིན་གཤེགས་པའི་རིགས་ལའོ། །​ཙནྡན་ནི་པདྨའི་རིགས་

eKangyur, UT4CZ5369-I1KG9214-0000, page 282 (141b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh543/UT22084-088-038-18989#UT22084-088-038-18989