གོ་ཆའི་བཀོད་པ་བསྟན་པ།

The Teaching of the Armor Array
F.116.b

Varma­vyūha­nirdeśa
F.116.b, volume 40, Degé Kangyur

འཇིག་རྟེན་དུ་བྱུང་སྟེ། བསྐལ་པའི་མིང་ནི་ཡང་དག་པར་རྒྱལ་བ་ཞེས་བྱའོ། །​འཇིག་རྟེན་གྱི་ཁམས་ནི་དྲི་མ་མེད་པ་ཞེས་བྱ་སྟེ། ས་གཞི་ཡངས་ལ་ཤིན་ཏུ་མཛེས་པ་རིན་པོ་ཆེ་སྣ་བདུན་ལས་མངོན་པར་གྲུབ་པའོ། །​དེའི་ཚེ་གླིང་ཆེན་པོ་དེ་ཆུ་ཞེང་འདྲ་སྟེ། དཔག་ཚད་བདུན་ཁྲི་བདུན་ཁྲི་ཡོད་དོ། །​དེ་ན་ཡང་གྲོང་ཁྱེར་ཆེན་པོ་དྲུག་ཁྲི་དྲུག་ཁྲི་ཡོད་དེ། གྲོང་ཁྱེར་རེ་རེའི་ཚད་ཀྱང་ཆུ་ཞེང་འདྲ་སྟེ། དཔག་ཚད་བཅུ་དྲུག་བཅུ་དྲུག་ཡོད་དོ། །​དེ་དག་ཀྱང་མཐའ་མ་ར་བས་འཁོར་བར་བསྐོར་ཅིང་། བ་གམ་གྱིས་བརྒྱན་པ། སྒོ་རབ་ཏུ་མཛེས་ཤིང་མཐོང་ན་དགའ་བ་དང་། ཤིང་ཏ་ལ་མཆོག་རྣམས་ཕྲེང་དུ་དཀྲིགས་པས་བསྐོར་བ། སྐྱེད་མོས་ཚལ་བརྒྱ་སྟོང་དུ་མས་རབ་ཏུ་བརྒྱན་པ། སྐྱེད་མོས་ཚལ་ཀུན་དུ་ཁྲི་དང་སྟན་ལེགས་པར་བཤམས་པ། རྫིང་དང་། རྫིང་བུ་དང་། འབབ་ཆུ་རྣམས་རབ་ཏུ་གང་ཞིང་འགྲམ་གྱི་སྟེགས་དང་། ལམ་རྣམས་རིན་པོ་ཆེ་སྣ་ཚོགས་གཅལ་དུ་བཀྲམ་པ། མཐའ་མའི་ས་གཞི་མཉམ་པ་འབྱུང་ཞིང་འཇུག་པའི་ཚེ་ཉམ་ང་བ་མེད་པ། །​འགྲམ་གྱི་འོབས་རྣམས་སུ་ཙན་དན་དང་། ཏ་མ་ལ་ལ་སོགས་པ་སྤོས་སྣ་ཚོགས་ཀྱི་ལྗོན་ཤིང་རྣམས་ཕྲེང་དུ་དཀྲིགས་པར་གྱུར་ཏོ། །​གྲོང་ཁྱེར་རེ་རེ་ན་ཡང་མི་བྱེ་བ་སྟོང་ཕྲག་བཅུ་བཅུ་གནས་ཏེ། སེམས་ཅན་དེ་དག་ཐམས་ཅད་ཀྱང་དགེ་བ་བཅུའི་ལས་ཀྱི་ལམ་རྣམས་ཡོངས་སུ་རྫོགས་པར་གྱུར་བའི་ཕྱིར། དེ་ལྟ་བུའི་བདེ་བ་རབ་ཏུ་མྱོང་པར་གྱུར་ཏོ། །​དེའི་ཚེ་དེ་བཞིན་གཤེགས་པ་དེ་བསྐལ་པ་དང་པོ་ནས་བསྐལ་པ་ཉིས་བརྒྱ་འདས་ནས་དེར་བྱུང་བས་དེའི་ཕྱིར་བསྐལ་པ་དེའི་མིང་ཡང་ཡང་དག་པར་རྒྱལ་བ་ཞེས་བྱའོ། །​བསྐལ་པ་དེ་ལ་དེ་བཞིན་གཤེགས་པ་ལྔ་བརྒྱ་རིམ་བཞིན་དུ་བྱུང་སྟེ། དེ་རེ་རེའི་ཞིང་ཡང་རིན་པོ་ཆེ་སྣ་བདུན་ལས་མངོན་པར་གྲུབ་པ་ཤ་སྟག་གོ །​དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་པའི་འོག་ཏུ་ཀུན་ཀྱང་འདྲ་སྟེ། ཡང་དག་པའི་ཆོས་ནི་ལོ་ཁྲིའི་བར་དུ་གནས་པར་གྱུར་ཏོ། །​དེ་ལྟར་དེ་བཞིན་གཤེགས་པ་ལྔ་བརྒྱ་པོ་དག་འཇིག་རྟེན་དུ་བྱུང་བ་དེ་དག་ལ་ཡང་ཉན་ཐོས་དང་། བྱང་ཆུབ་སེམས་དཔའི་འཁོར་འདུས་པ་རབ་ཏུ་མང་སྟེ། འདུས་པ་རེ་རེའི་ཚེ་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་

eKangyur, UT4CZ5369-I1KG9166-0000, page 232 (116b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh51/UT22084-040-002-989#UT22084-040-002-989