གོ་ཆའི་བཀོད་པ་བསྟན་པ།

The Teaching of the Armor Array
F.104.b

Varma­vyūha­nirdeśa
F.104.b, volume 40, Degé Kangyur

དམིགས་སུ་མེད་པ་ཡིན། །​སྐྱོན་བྲལ་དང་ནི་འགགས་པའི་ཆོས། །​རབ་དབེན་མྱ་ངན་འདས་པའི་ཆོས། །​རིང་བ་མ་ཡིན་ཉེ་མིན་པས། །​ཐམས་ཅད་དམིགས་སུ་མེད་པ་ཡིན། །​ཐེག་པ་འདི་དང་གོ་ཆ་འདི། །​ལམ་འདི་ལ་ནི་འཛིན་མེད་ཅིང་། །​བླ་མེད་གཡོ་བ་མེད་པས་ན། །​མཐར་ནི་གང་ཡང་དམིགས་སུ་མེད། །​ཆོས་ཀྱི་རང་བཞིན་ཐམས་ཅད་དང་། །​དེ་ཁོ་ན་ཡི་མཚན་ཉིད་ནི། །​གདགས་སུ་རུང་བ་མ་ཡིན་ཏེ། །​ཆོས་ཉིད་རྣམས་ནི་སྟོང་ཕྱིར་རོ། །​ཐེག་པ་འདི་དང་གོ་ཆ་འདི། །​ལམ་འདི་བསྟན་དུ་མེད་པ་ཡིན། །​ཆོས་རྣམས་རང་བཞིན་ཇི་ལྟ་བ། །​དེ་ཡི་རང་བཞིན་དེ་བཞིན་ནོ། །​ཆོས་རྣམས་དག་ནི་ཐམས་ཅད་ལ། །​མཚན་ཉིད་རང་བཞིན་མེད་པའི་ཆོས། །​ང་ཡིས་མདོར་ནི་བསྟན་པ་ཡིན། །​ཆོས་རྣམས་ཐམས་ཅད་དག་ལ་ནི། །​རང་བཞིན་མཚན་ཉིད་ཐམས་ཅད་ཀུན། །​ཇི་ལྟར་ངས་ནི་བཤད་པ་བཞིན། །​མཐར་ནི་ཡོད་པར་མི་འགྱུར་རོ། །​ཐེག་པ་འདི་དང་ལམ་འདི་དང་། །​གོ་ཆའི་རང་བཞིན་མཚན་ཉིད་ལ། །​ཚིག་གིས་བརྗོད་པ་རབ་བསལ་ནས། །​མཐར་ནི་དམིགས་པར་འགྱུར་མ་ཡིན། །​ཚིག་ནི་ཡོད་པ་མ་ཡིན་ཕྱིར། །​ངོ་མཚར་རབ་ཏུ་གྱུར་པ་ཡིན། །​ཚིག་གི་བརྗོད་པ་དེ་དག་ལ། །​ངག་གི་མཚན་ཉིད་ཡོད་མ་ཡིན། །​ཆོས་རྣམས་དག་ནི་གཞལ་དུ་མེད། །​མཆོག་དང་ཀུན་ཏུ་གཞལ་དུ་མེད། །​ཐམས་ཅད་དཔག་ཏུ་མེད་པས་ན། །​དེ་ཕྱིར་ཆོས་ནི་བླ་ན་མེད། །​ཐེག་པ་འདི་དང་གོ་ཆ་འདི། །​ལམ་འདི་ཡང་ནི་དེ་བཞིན་དུ། །​མཚན་མ་མེད་པ་དེ་དག་ལ། །​དེ་ལྟར་རྗེས་སུ་འཇུག་པར་བྱ། །​སེམས་ཅན་རྣམས་ནི་ཀུན་གྱིས་ཀྱང་། །​ཡོངས་ཤེས་ནན་ཏན་བསྒྲུབ་པ་དང་། །​མྱུར་དུ་ཆོས་སྣང་ཐོབ་བྱའི་ཕྱིར། །​དེ་ཕྱིར་ངས་ནི་དེ་སྐད་བསྟན། །​ཆོས་རྣམས་ལ་ནི་ཚིག་མེད་པས། །​ཐམས་ཅད་བརྗོད་དུ་མེད་པ་ཡིན། །​ཆོས་རྣམས་དེ་དག་ཀུན་ལ་ནི། །​ཐམས་ཅད་རྗེས་སུ་འཇུག་པར་བྱ། །​ཆོས་ལ་ཚིག་ནི་མེད་པའི་ཕྱིར། །​དེ་ཡི་རྗེས་སུ་འབྲང་བར་བྱ། །​སྤྱོད་ཀྱང་སྤྱད་པ་ཅུང་ཟད་མེད། །​ཐམས་ཅད་ཆོས་ནི་སྤྱོད་པ་མེད། །​ཚོལ་བ་མེད་ཅིང་མོས་ཚོལ་མེད། །​འགྲོ་བ་མེད་པས་རྗེས་སུ་འབྲང་། །​དེ་ལྟར་རྗེས་སུ་གང་འབྲང་བ། །​དོན་ལ་སོ་སོར་རྟོག་མི་བྱེད། །​ཁྱོད་

eKangyur, UT4CZ5369-I1KG9166-0000, page 208 (104b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh51/UT22084-040-002-965#UT22084-040-002-965