དམ་པའི་ཆོས་དྲན་པ་ཉེ་བར་གཞག་པ།

The Application of Mindfulness of the Sacred Dharma
F.215.a

Saddharma­smṛtyupasthāna
F.215.a, volume 69, Degé Kangyur

དེའི་བཀའ་ཡེ་ཤེས་ཆུས། །​དག་པ་ཉིད་དུ་འཁྲུ་བར་མཛད། །​མུ་སྟེགས་ཤེས་པའི་ང་རྒྱལ་ཅན། །​ཀུན་གྱིས་གནས་གང་མ་མཐོང་བ། །​གནས་དེ་ཁྱོད་ཀྱི་དྲི་མ་མེད། །​གསུང་རྣམས་ཀྱིས་ནི་མི་ལ་བསྟན། །​སྐྱེ་བོ་ཤིན་ཏུ་བག་མེད་པ། །​འདི་དག་མགོན་པོ་ཁྱོད་ཀྱིས་བསྒྲལ། །​མགོན་པོ་རྒལ་ནས་ཕ་རོལ་གཤེགས། །​སྐྱེ་བོ་གཞན་ཡང་སྒྲོལ་བར་མཛད། །​སྐྱེ་བོ་ཀུན་ལ་སྨན་སླད་དུ། །​ཁྱོད་ཉིད་གཅིག་པུར་བཞུགས་པར་བྱས། །​ཕན་མེད་རྣམས་ལ་ཕན་མཛད་ཕྱིར། །​ཁྱོད་ཉིད་ཁོ་ན་མི་མཆོག་ལགས། །​དེ་ལྟར་བརྒྱ་བྱིན་དེས་གཟུགས་བརྙན་དེ་ལ་བསྟོད་ཅིང་། གུས་པར་ཕྱག་འཚལ། ལྷ་ཐམས་ཅད་དང་བཅས་པས་ཀྱང་བཅོམ་ལྡན་འདས་ཀྱི་གཟུགས་བརྙན་སྤྲུལ་པ་དེ་ལ་མངོན་པར་ཕྱག་འཚལ། ན་བཟའ་ཆོས་གོས་བྱིན་གྱིས་བརླབས་པ་ཐགས་སུ་མ་བཏགས་པ་གང་ཡིན་པ་དེ་ལ་ཡང་ལྷ་རྣམས་མགོ་བོས་ཕྱག་འཚལ་ཏེ། གཟུགས་བརྙན་དེ་མཐོང་ནས་ཡང་རྒྱགས་པ་ཉིད་ཡོངས་སུ་ཉམས་པར་གྱུར་ཏོ། །​དེའི་རྫུ་འཕྲུལ་གྱིས་མཛད་པའི་གཟུགས་བརྙན་གྱི་རྣམ་པ་ཇི་ལྟ་བུར་བཞུགས་པ་དེ་ལྟ་བུར་བརྒྱ་བྱིན་གྱིས་འབུམ་གྱི་ཆར་ཡང་མི་ཕོད་ན། ལྷ་གཞན་གྱིས་ལྟ་སྨོས་ཀྱང་ཅི་དགོས། དེ་ནས་བརྒྱ་བྱིན་གྱིས་རྫུ་འཕྲུལ་མཛད་པའི་གཟུགས་བརྙན་དེ་མཐོང་ནས། དེ་ནས་ཡང་ལྷ་དེ་རྣམས་ལ་ཕན་པར་བྱ་བ་དང་ལྷ་བག་མེད་པས་མྱོས་པ་རྣམས། བག་མེད་པ་དང་དབྲལ་བར་བྱ་བའི་ཕྱིར། ལས་ཀྱི་དྲ་བ་སྐྱེ་བ་དང་འཆི་བའི་ངོ་བོ་རྫུ་འཕྲུལ་བྱས་པ་དེ་བསྟན་ཏོ། །​དེ་ནས་ལྷ་དེ་རྣམས་ཀྱིས་བརྒྱ་བྱིན་ལ་སྨྲས་པ། ལྷའི་དབང་པོ་འདི་ལྟར་བཅོམ་ལྡན་འདས་དེས་ཤིང་སཱ་ལ་ཟུང་འདིའི་ནང་དུ་ལས་ཀྱི་དྲ་བ་སྐྱེ་བ་དང་འཆི་བའི་ངོ་བོ་འདི་སྤྲུལ་པ་མཛད་ལ། སླད་རོལ་དུ་ཅིའི་སླད་དུ་མ་མཛད། འདི་ལྟར་ང་ཡང་དེ་ལ་ངོ་མཚར་ཆེར་སྐྱེས་ཏེ། དེ་ནས་ལྷ་དེས་ང་རྒྱགས་པ་དང་དབྲལ་བར་བྱ་བའི་ཕྱིར་འདི་བསྟན་ཏོ། །​དེ་ཉིད་ལ་ངས་དྲིས་པ་དང་དེས་སྨྲས་པ། འདི་ལྟར་འདི་རྟག་ཏུ་མཐོང་བ་དང་སྐྱེ་བོ་ཐམས་ཅད་ངོ་མཚར་ཆེར་སྐྱེས་ཏེ། དེ་ངོ་མཚར་ཆེ་བར་རིག་ནས་འཇིགས་པར་བྱ་བ་དང་

eKangyur, UT4CZ5369-I1KG9195-0000, page 429 (215a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh287/UT22084-068-021-100928#UT22084-068-021-100928