དམ་པའི་ཆོས་དྲན་པ་ཉེ་བར་གཞག་པ།

The Application of Mindfulness of the Sacred Dharma
F.177.a

Saddharma­smṛtyupasthāna
F.177.a, volume 69, Degé Kangyur

དུ་འདོང་བ་དེའི་ཚེ་ཤིང་ལྗོན་པ་དེ་རྣམས་ཀྱི་གཟུགས་གསར་དུ་སྐྱེ་སྟེ། འདི་ལྟར་ལྷ་མོ་དེ་དག་གིས་འབྲས་བུ་བདེ་བར་བཏོག་ཏུ་སླེབས་པར་འགྱུར་རོ། །​ཚལ་དེ་ཡང་ཀུན་ནས་རིན་པོ་ཆེ་སྣ་བདུན་ལས་སྐྱེས་པ། ཤིང་ལྗོན་པ་ཉི་མ་ཤར་བའི་འོད་ལྟ་བུ་རྣམས་ཀྱིས་བརྒྱན་པ། མེ་ཏོག་དང་འབྲས་བུ་ཁ་དོག་དུ་མ་རྣམས་ཀྱིས་བརྒྱན་པ། བྱ་སྣ་ཚོགས་སྒྲ་འབྱིན་ཅིང་དགའ་བར་བྱེད་པའི་བྱ་རྣམས་ཀྱིས་བརྒྱན་པ། ལོ་མའི་ནང་དུ་གནས་པའི་བྱ་སྒྲ་འབྱིན་པ་རྣམས་ཀྱིས་ཚལ་དེ་ཀུན་ནས་སྒྲ་འབྱིན་པ་ལྟ་བུ་ཡིན་ཏེ། དེ་ལྟར་ཤིན་ཏུ་དགའ་བའི་ཚལ་དེ་ན་ལྷ་དེ་རྣམས་ཡུལ་དྲུག་ལ་ཆགས་པའི་སྲེད་པས་དགའ་བར་བྱེད། དགོད་པར་བྱེད། རྩེ་བར་བྱེད། དགའ་དགུར་སྤྱོད་པར་བྱེད་དོ། །​དེ་དག་འདི་ལྟར་ཤིན་ཏུ་ཉམས་དགའ་བ་མིག་དང་རྣ་བ་དང་སྣའི་རོ་དགའ་བའི་ཚལ་དེ་ནས་མཐོ་བརྩེགས་ཞེས་བྱ་བ་རི་རབ་ཀྱི་རྩེ་མོ་དེར་འདོང་བར་བྱེད་དོ། །​ལྷ་མོ་བལྟ་ན་སྡུག་ཅིང་རྒྱན་དང་ཆ་བྱད་སྡུག་པ་དེ་རྣམས་ཉེ་བ་ན་གླུ་དབྱངས་ལེན་བཞིན་དུ་མཐོ་བརྩེགས་ཞེས་བྱ་བ་རི་རབ་ཀྱི་རྩེ་མོ་ཀུན་ནས་རྒྱར་དཔག་ཚད་བཅུ་ཡོད་པ་དེར་དོང་ངོ་། །​དེའི་སྟེང་ན་རྣམ་པར་མཛེས་པ་ཞེས་བྱ་བའི་རྫིང་རིན་པོ་ཆེ་སྣ་བདུན་གྱི་མེ་ཏོག་ཨུད་པ་ལ་སྔོན་པོ་དང་། ཀོ་ཀ་ན་དང་། ཀུ་མུ་ད་རྣམས་ཀྱིས་ཁེབས་པ་ཆུ་རྙོག་པ་མེད་ཅིང་། བྱ་ངང་པ་དང་ངུར་པའི་སྒྲ་རྣར་སྙན་པ་འབྱིན་པ་ཀུན་ནས་ཁང་བཟངས་ཀྱིས་ཡོངས་སུ་བསྐོར་ཅིང་། རིན་པོ་ཆེ་སྣ་བདུན་གྱི་ཀ་བ་རྣམས་ཀྱིས་བརྒྱན་པ། ཀུན་ནས་ཚལ་དང་ཉེ་བའི་ཚལ་གྱིས་ཕྱོགས་བསྐོར་བ། གཟུགས་བལྟ་ན་སྡུག་པ་རྣམས་ཀྱིས་རྫིང་བསྐོར་བར་ལྷ་དེ་རྣམས་ལྷ་མོའི་ཚོགས་ཀྱིས་ཡོངས་སུ་བསྐོར་ནས་བྲོ་གར་བྱེད། དགོད་པར་བྱེད། རྩེ་བར་བྱེད་དོ། །​མྱོས་པའི་སྐྱོན་དང་བྲལ་བའི་ལྷའི་ཆང་དག་ལ་འཐུང་བར་བྱེད་ཅིང་། འདོད་པའི་རོ་དྲུག་ཏུ་གྱུར་པའི་འབྲས་བུ་ཞིམ་པོ་གཞན་དག་ལ་ཟ་ལ། འབྲས་བུ་དེ་དག་གི་ནང་ན་ཡོད་པའི་ཆང་ལ། ལྷ་མོ་རྒྱན་དང་ཆ་བྱད་སྣ་ཚོགས་ཐོགས་པ་དེ་དག་དང་ལྷན་ཅིག་འཐུང་བར་བྱེད་དོ། །​ཕྱོགས་གཞན་ན་ལྷ་མོ་རྣམས་གླུ་དབྱངས་ལེན། དགོད་པ་བྱེད་ཅིང་པི་བང་དང་གླིང་བུ་དང་ཁར་རྔ་ལ་མཁས་པ་ཕན་ཚུན་དགའ་བར་གནས་པའི་ལྷ་མོ་དང་ལྷའི་ཚོགས་དག་རྫིང་

eKangyur, UT4CZ5369-I1KG9195-0000, page 353 (177a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh287/UT22084-068-021-100852#UT22084-068-021-100852