དམ་པའི་ཆོས་དྲན་པ་ཉེ་བར་གཞག་པ།

The Application of Mindfulness of the Sacred Dharma
F.16.a

Saddharma­smṛtyupasthāna
F.16.a, volume 69, Degé Kangyur

ཆུ་གཡོས་པས་ས་གཡོ་བར་བྱེད་པའི་རྒྱུ་ནི་གང་རྐྱེན་ནི་གང་གཞི་ནི་གང་ཡིན་སྙམ་ནས། དགེ་སློང་དེས་ཐོས་པ་ལས་བྱུང་བའི་ཤེས་པའམ། ལྷའི་མིག་གིས་བརྟགས་ན། རླུང་གིས་ཆུ་འཛིན་ལ། ཆུ་ལ་ས་བརྟེན་ཏེ། རླུང་དེ་དག་གཡོས་ན་ཆུ་གཡོ་བར་འགྱུར། དེ་དག་གཡོས་པས་ས་གཡོ་བར་འགྱུར་རོ་སྙམ་ནས་དེ་ལྟར་རྒྱུ་དེས་ན་ས་གཡོ་བར་འགྱུར་རོ། །​ས་གཡོ་བ་དེ་ཡང་དགེ་སློང་དེས་རྣམ་པ་གཉིས་སུ་མཐོང་སྟེ། གལ་ཏེ་དགེ་བའི་ལས་ཀྱི་དབང་གིས་གཡོ་ན་ནི་དེ་དགེ་བར་འགྱུར་ཏེ། སེམས་ཅན་རྣམས་ཀྱི་བདེ་བ་དང་ལོ་ལེགས་པ་ཡིན་ནོ། །​གལ་ཏེ་མི་དགེ་བའི་དབང་གིས་གཡོ་ན་ནི་ལས་ཀྱི་མཐའ་སྤྱད་ཅིང་གང་བྱས་པའི་སེམས་ཅན་རྣམས་ཀྱི་དེ་མི་དགེ་བར་འགྱུར་རོ། །​དགེ་བ་དང་མི་དགེ་བ་ལ་རག་ལས་པ་ཐམས་ཅད་ནི་རྒྱུ་མེད་པ་མ་ཡིན། འདོད་རྒྱལ་ལས་བྱུང་བ་མ་ཡིན། བྱེད་པ་པོས་གནས་སུ་བྱས་པ་མ་ཡིན་ཏེ། རྒྱུ་དང་འཐུན་པར་འབྲས་བུ་འབྱུང་ངོ་། །​འབྲས་བུ་མངོན་པར་མི་ཤེས་པའི་རྟོག་གེ་པ་དག་ན་རེ། འདི་ལྟར་དབང་པོའི་ཕྱོགས་དག་ས་གཡོའོ། །​རླུང་གི་ཕྱོགས་དག་ས་གཡོའོ། །​ཆུ་ལྷའི་ཕྱོགས་དག་ས་གཡོ་སྟེ། ལོ་ལེགས་པར་འགྱུར་རོ། །​ལོ་ཉེས་པར་འགྱུར་རོ། །​རྒྱལ་པོ་ལ་རུང་བར་འགྱུར་རོ། །​རྒྱལ་པོ་ལ་མི་རུང་བར་འགྱུར་རོ། །​ཆར་ལེགས་པར་འབབ་པར་འགྱུར་རོ། །​ཆར་ལེགས་པར་འབབ་པར་མི་འགྱུར་རོ། །​མཚོན་གྱིས་འཁྲུག་པར་འགྱུར་རོ། །​མཚོན་གྱིས་འཁྲུག་པ་མེད་པར་འགྱུར་རོ། །​བ་ལང་དང་བྲམ་ཟེ་འཕེལ་བར་འགྱུར་རོ། །​བ་ལང་དང་བྲམ་ཟེ་འགྲིབ་པར་འགྱུར་རོ་ཞེས་དེ་ལྟར་རྟོག་གེ་པ་དག་རྟོག་པར་བྱེད་དོ། །​དེ་ཡང་གཅིག་ཅིག་ཡིན་ཏེ། གལ་ཏེ་འདོད་རྒྱལ་བ་བརྒྱ་སྙེད་ཡོད་པ་དེ་དག་གི་ནང་ན་འདི་ལྟར་འདུ་ཤེས་པ་འདི་ཁོ་ན་ཉིད་གཅིག་ཡིན་ནོ་ཞེས་དེ་དག་རྗོད་པར་བྱེད་དོ། །​དེ་ནས་གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་ལྷ་མ་ཡིན་མགུལ་ཕྲེང་དང་། ལྷ་མ་ཡིན་གྱི་དབང་པོ་བརྟན་པ་དང་། ཀླུའི་རྒྱལ་པོ་ཆོས་དང་མི་ལྡན་པ་རབ་འཇོམས་ལ་སོགས་པ་འཇིག་རྟེན་ལ་ཕན་པར་མི་བྱེད་པ་ཤེས་ནས། གཉེན་པོ་ཆོས་དང་ལྡན་

eKangyur, UT4CZ5369-I1KG9195-0000, page 31 (16a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh287/UT22084-068-021-100530#UT22084-068-021-100530