དམ་པའི་ཆོས་དྲན་པ་ཉེ་བར་གཞག་པ།

The Application of Mindfulness of the Sacred Dharma
F.282.a

Saddharma­smṛtyupasthāna
F.282.a, volume 68, Degé Kangyur

རྒྱས་ཀྱི་གསུང་རབ་ཡི་གེར་བྲིས་པ་འབྱིད་དམ། ཀླན་ཀ་བཙལ་བའི་ཕྱིར་མཁས་པ་དག་ལ་མི་མཁས་པའི་བདག་ཉིད་ཅན་གྱིས་སངས་རྒྱས་ཀྱི་གསུང་རབ་ཉན་པར་བྱེད་དེ་ཐོས་ནས་ཀྱང་ཆོས་འདུལ་བ་དེ་ལ་འཇུག་པར་མི་བྱེད་ཅིང་ཡོངས་སུ་མི་སྙན་པར་བརྗོད་ལ་བརྗོད་ནས་ཀྱང་ཀུན་ཏུ་བསྟེན་ཅིང་བསྒོམས་ལ་མང་དུ་བྱེད་ན་དེ་ལུས་དང་བྲལ་ནས་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་འགྲོ་བ་མེས་སྲེག་ཏུ་སྐྱེ་བར་འགྱུར་རོ། །​དེར་སྐྱེས་ནས་ཀྱང་གང་སེམས་ཅན་དམྱལ་བ་ཡང་སོས་ལ་སོགས་པའི་གནོད་པ་བསྡུས་པ་དེ་དག་ཐམས་ཅད་བརྒྱ་འགྱུར་དུ་འབྱུང་ངོ་། །​ཁྱད་པར་དུ་འབྱུང་བ་ནི་འདི་ལྟར་སེམས་ཅན་དམྱལ་བ་དེ་ལ་ཁྱད་པར་ཐམས་ཅད་སྟོང་འགྱུར་དུ་འབྱུང་སྟེ། སྦྲུལ་རྣམས་ཀྱིས་འཁྲིས་ཤིང་ཀུན་ནས་དྲ་བར་གང་བ་དེར་སེམས་ཅན་དམྱལ་བ་པ་དེར་འགྲོ་བར་བྱེད་དོ། །​འགྲོ་བ་ན་གཤིན་རྗེའི་མི་ལག་ན་ཐོ་བ་ཐོགས་པ་དེ་དག་ཐམས་ཅད་ཀྱིས་སྲེག་པར་བྱེད་དེ་དུག་གི་མེ་ཚན་པོ་ཆེས་ཀྱང་སྲེག་པར་བྱེད་དོ། །​དེ་དུག་དང་སེམས་ཅན་དམྱལ་བའི་མེ་གཉིས་ཀྱི་ནང་དུ་སྲེག་པ་ན་སྙིང་རྗེ་རྗེ་སྐད་དུ་ངུ་སྐད་འབྱིན་སྨྲེ་སྔགས་འདོན་ཆོ་ངེས་འདེབས་སོ། །​དེ་དེ་ལྟར་ཆོ་ངེས་འདེབས་པ་དང་། འདི་ལྟར་གཤིན་རྗེའི་མི་རྣམས་ཀྱིས་རྗེས་སུ་བསྟན་པ་ཚིགས་སུ་བཅད་དེ་སྨྲས་པ། གླེན་པ་དམ་པའི་ཆོས་ཡུལ་ལ། །​རྨོངས་པའི་ཤུགས་ཀྱིས་ཐམས་ཅད་དུ། །​སྲེད་པའི་དུག་གིས་མྱོས་པ་དག །​དོན་མེད་ཅི་ཞིག་ཡོངས་སུ་སྨྲེ། །​སྡིག་བྱེད་དགའ་ལྟར་མཐོང་བ་ནི། །​བཟློག་ན་མཐོང་བ་མེད་པ་ཡིན། །​སྡིག་པ་བྱེད་ཚེ་བདེ་བ་ནི། །​བཟློག་ན་མེ་དང་འདྲ་བ་ཡིན། །​སྡིག་པ་བྱེད་པའི་མི་དག་ནི། །​འཇིག་རྟེན་ཀུན་གྱིས་རྣམ་པར་སྨད། །​དགེ་བ་བྱེད་པ་རྟག་ཏུ་བསྟོད། །​དེ་བས་སྡིག་པ་རྣམ་པར་སྤོངས། །​མི་འདོད་མི་ཕན་སྡང་བ་ཡི། །​རྣམ་པར་སྨིན་པ་སྡུག་བསྔལ་ཚ། །​སྡིག་པ་སྡིག་པའི་རྣམ་སྨིན་ཏེ། །​དེ་ལྟར་བློ་ལྡན་དེ་སྤོངས་ཤིག །​སྡིག་ལ་རྟག་ཏུ་སྡིག་པ་ཡོད། །​སྡིག་པ་མེད་ལ་སྡིག་མེད་དོ། །​བྱེད་ལ་ལྟོས་ལ་སྡིག་ཡོད་དེ། །​བྱེད་པ་རྣམས་ཀྱི་རྗེས་སུ་འཇུག །

eKangyur, UT4CZ5369-I1KG9194-0000, page 563 (282a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh287/UT22084-068-021-100427#UT22084-068-021-100427