དམ་པའི་ཆོས་དྲན་པ་ཉེ་བར་གཞག་པ།

The Application of Mindfulness of the Sacred Dharma
F.135.b

Saddharma­smṛtyupasthāna
F.135.b, volume 71, Degé Kangyur

ན། དེས་བདག་ལ་རྣམ་པ་སྣ་ཚོགས་པར་གཞང་སྨིན་པར་བྱེད་པའི་ནད་རྣམས་སྐྱེད་པར་བྱེད་དོ། །​འདི་ལྟ་སྟེ་རློན་པ་དང་། སྐམ་པ་དང་། ལྷན་ཅིག་སྐྱེས་པ་དང་། སྔོན་གྱི་དུས་ན་སྐྱེས་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། གསུམ་གྱི་སྐྱོན་ལས་སྐྱེས་པའི་འདུས་པ་ལས་གྱུར་པའོ། །​དེ་གལ་ཏེ་ལྟོགས་པར་གྱུར་ན་ངའི་བཤང་བ་རྒྱུ་བར་གྱུར་པའི་སྦུབས་སུན་འདོན་པར་བྱེད་དོ། །​ཁྲག་རྒྱུ་བར་གྱུར་པའམ། ཁུ་བ་རྒྱུ་བར་གྱུར་པ་ཡང་རུང་སྟེ། བདག་གི་མེ་དྲོད་ཀྱང་ཉམས་པར་བྱེད་དོ། །​བདག་གི་མེ་དྲོད་ཉམས་པ་དེས་གཞང་སྨིན་པར་བྱེད་པའི་སྲིན་ཁྲོ་བ་རབ་ཏུ་སྐྱེ་བར་འགྱུར་ཏེ། དེས་ངའི་གཞང་རྣམ་པ་སྣ་ཚོགས་པ་རྣམས་སུ་སྨིན་པར་བྱེད་དོ། །​དེས་གཞང་སྨིན་པར་བྱེད་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རིག་པར་བྱེད་དོ། །​གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། སྲིན་གྱི་རིགས་བཅུ་ལྷ་བ་ལ་རྒྱུ་བ་རྣམས་འདི་ལྟ་སྟེ། སྤུ་ལ་ཡོད་པ་དང་། ཁ་ནག་པ་དང་། སྤྲོ་བ་མེད་པ་དང་། ལུ་བའི་གཟེར་ཟུག་ཆེན་པོ་དང་། རྨོངས་པར་བྱེད་པ་དང་། མེ་མདོག་ཅན་དང་། འོག་ཏུ་འགྲོ་བ་དང་། ཨཽ་ཊྷིང་གཱ་དང་ཀུན་དུ་རྟོག་པ་དང་། དགའ་བ་པ་དང་རྣམས་སོ། །​གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། སྤུ་ལ་ཡོད་པ་ཞེས་བྱ་བའི་ལུས་ཐམས་ཅད་ཀྱི་སྤུ་ལ་གནས་པ་ཡིན་ཏེ། དེ་གལ་ཏེ་ལྷ་བ་ངན་པར་གྱུར་ན་སྙོམས་པར་ལྷ་བ་རྣམས་སུན་འདོན་ནོ། །​ལམ་དུ་འགྲོ་བར་ཡང་གྱུར་ནས་ཡན་ལག་དང་ཉིང་ལག་རྣམས་ཐམས་ཅད་ཀྱི་བདག་གི་ལྷ་བ་རྣམས་སུན་ཕྱུང་ནས་ཟ་བར་བྱེད་དོ། །​དེའི་སྐྱོན་གྱིས་བདག་མདོག་ངན་པ་དང་། མཛེ་དང་རུས་པའི་གཟེར་བ་དང་། སྟོབས་ཟད་པར་ཡང་འགྱུར་རོ། །​དེས་སྤུ་ལ་ཡོད་པའི་སྲིན་ལ་སོ་སོར་བརྟགས་པར་གྱུར་པས་

eKangyur, UT4CZ5369-I1KG9197-0000, page 270 (135b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh287/UT22084-068-021-102005#UT22084-068-021-102005