དམ་པའི་ཆོས་དྲན་པ་ཉེ་བར་གཞག་པ།

The Application of Mindfulness of the Sacred Dharma
F.165.a

Saddharma­smṛtyupasthāna
F.165.a, volume 68, Degé Kangyur

སེམས་ཅན་དམྱལ་བ་དེ་དག་གི་ལྟོ་ཡང་མེས་གང་བར་འགྱུར་ཏེ། རང་གི་ལས་ཀྱི་རྣམ་པར་སྨིན་པ་དྲག་ཅིང་མི་བཟད་པས་ལོ་འབུམ་ཕྲག་དུ་མར་ཕྱི་ནང་སྲེག་ཅིང་ཟའོ། །​སྲིན་བུ་ཨ་ཙ་ཟེར་ཞེས་བྱ་བར་ཡང་སྐྱེ་བར་འགྱུར་ཏེ། གང་སེམས་ཅན་དམྱལ་བའི་མི་དེ་དག་གི་ཤ་ལ་ཟའོ། །​ཤ་ཟོས་ནས་ཁྲག་འཐུང་ངོ་། །​ཁྲག་འཐུང་ནས་རྒྱུས་པ་གཅོད་དོ། །​རྒྱུས་པ་བཅད་ནས་རུས་པ་འཆའ། རྐང་འཇིབ་ཅིང་རྒྱུ་མ་དང་། གཉེ་མ་དག་ལ་ཟ་བར་བྱེད་དོ། །​དེ་སྲེག་ཅིང་འཚེད་ལ་ཟ་བ་ན། འོ་དོད་འབོད་ཅིང་ངུ་ལ་ཆོ་ངེས་འདེབས་ཤིང་སྙིང་རྗེ་རྗེ་སྐད་དུ་སྨྲེ་སྔགས་འདོན་ཏོ། །​ཇི་སྲིད་དུ་རྣམ་པར་སྨིན་པའི་འབྲས་བུ་ཉེ་བར་མ་སྤྱད་ཀྱི་བར་དུ་དེའི་ཉེས་པར་སྤྱད་པའི་ལས་དྲག་ཅིང་མི་འདོད་ལ་མི་སྡུག་ཅིང་ཡིད་དུ་མི་འོང་བར་འགྱུར་ཏེ། ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་བྱས་པ་དེ་སྲིད་དུ་དེ་ལོ་འབུམ་ཕྲག་དུ་མར་སྲེག་ཅིང་འཚེད་ལ་ཟ་བར་བྱེད་དོ། །​དེ་ཕྱིས་སེམས་ཅན་དམྱལ་བ་དེ་ལས་ཐར་བར་འགྱུར་ཏེ། ཐར་ནས་ཀྱང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ཡི་དགས་དང་དུད་འགྲོ་དག་ཏུ་མ་སྐྱེས་ལ་མི་རྣམས་དང་སྐལ་བ་མཉམ་པར་མིར་སྐྱེས་ན། མི་དེའི་ལས་ཀྱི་རྒྱུ་འཐུན་པའི་འབྲས་བུའི་རྒྱུས་དེ་ལ་འགྲན་ཟླ་མང་ཞིང་། རྒྱལ་པོའི་ཕོ་བྲང་འཁོར་དུ་དེའི་འགྲུབ་པ་མེད་པར་འགྱུར། དབུལ་ཞིང་ནོར་རྫས་ཐམས་ཅད་ཉམས་པར་འགྱུར་ལ་ཚེ་ཐུང་བར་འགྱུར་རོ། །​དེ་ནས་གཞན་ཡང་དགེ་སློང་དེ་སེམས་ཅན་དམྱལ་བ་ཆེན་པོ་བསྡུས་གཞོམ་གྱི་འཁོར་ལ་རྟོག་པར་བྱེད་དེ། ལས་ཀྱི་རྣམ་པར་སྨིན་པ་བྱས་ལ་བསགས་པ་ལས་ཀྱི་ཉེར་བསྡོགས་དང་། ལས་ཀྱི་མཇུག་གང་གིས་སེམས་ཅན་དམྱལ་བ་ཀྱི་ཧུད་ཟེར་བར་སྐྱེ་བར་འགྱུར་སྙམ་ནས་དེས་ཐོས་པ་ལས་བྱུང་བའི་ཤེས་པས་བརྟགས་ན། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཀུན་དུ་བསྟེན་ཅིང་བསྒོམས་ཏེ་མང་དུ་བྱས་པ་ནི། དེ་ལུས་དང་བྲལ་ནས་ངན་འགྲོ་ལོག་པར་

eKangyur, UT4CZ5369-I1KG9194-0000, page 329 (165a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh287/UT22084-068-021-100193#UT22084-068-021-100193