The Acceptance That Tames Beings with the Sky-Colored Method of Perfect Conduct
F.176.a

ལ་ལ་ཡང་ཉིན་མཚན་བདུན་གྱིས་ཤིན་ཏུ་གཏོང་བར་བྱེད། ལ་ལ་ཡང་སློང་བ་གཅིག་གིས་ཉིན་མཚན་ཤིན་ཏུ་གཏོང་བར་བྱེད། ལ་ལ་གཉིས་དང་གསུམ་ནས་བདུན་གྱི་བར་དུ་སློང་བས་ཉིན་མཚན་ཤིན་ཏུ་གཏོང་བར་བྱེད། ལ་ལ་ཚེར་མའི་ནང་དུ་མལ་བྱེད་པ་དང་། ལ་ལ་ཞིང་གི་རོལ་དང་། ལ་ལ་རུས་པ་དང་། ལ་ལ་ཐལ་བ་དང་། ལ་ལ་གྲམ་བུ་དང་། ལ་ལ་རྡོ་བ་དང་། ལ་ལ་གཏུན་བུའི་སྡུག་བསྔལ་གྱི་ནང་དུ་མལ་བྱེད་པར་འགྱུར་རོ། །​ལ་ལ་སྟན་གྱིས་ཡོངས་སུ་བསྐོར་བ་དང་། ལ་ལ་ལག་པ་གྱེན་དུ་ཉིན་མཚན་ཤིན་ཏུ་གཏོང་བར་བྱེད། ལ་ལ་ལག་པ་ཡན་ལག་ལ་འཇུས་ཤིང་ཉིན་མཚན་ཤིན་ཏུ་གཏོང་བར་བྱེད། ལ་ལ་སྐྲ་དང་། ཨག་ཙོམ་དང་། ལ་ལ་རྐང་པའི་ཡན་ལག་ལ་འཇུས་ཤིང་ཉིན་མཚན་ཤིན་ཏུ་གཏོང་བར་བྱེད། ལ་ལ་ཆུའི་ནང་དུ་ཞུགས་ཏེ་ཉིན་མཚན་ཤིན་ཏུ་གཏོང་བར་བྱེད། ལ་ལ་རྐང་པ་གཅིག་གིས་ཟླ་བ་བསྟོད་པས་ན་ཉིན་མཚན་ཤིན་ཏུ་གཏོང་བར་བྱེད། ཉི་མས་སྐེམས་པས་ན་ཉིན་མཚན་ལྔས་ཤིན་ཏུ་གཏོང་བར་བྱེད། ལ་ལ་སྐྲ་དང་ཨག་ཙོམ་འཐོག་པ་དང་ལྡན་པས་ཉིན་མཚན་ཤིན་ཏུ་གཏོང་བར་བྱེད། ལ་ལ་རལ་པ་ཡང་འཛིན་པར་བྱེད། ཆུ་ཡང་འཛིན་པར་བྱེད། དབྱིག་པ་གསུམ་སྤྱོད་པར་བྱེད། ལ་ལ་རི་ལ་ལྟུང་བར་བྱེད། ལ་ལ་མེ་ལ་ལྟུང་བར་བྱེད། ལ་ལ་ཆུ་ལ་འཇུག་པར་བྱེད། ལ་ལ་རི་དང་ཤིང་དང་ལྟེང་ཀའི་ལྷ་བྲན་ལ་ཕྱག་བྱ་བས་ཉིན་མཚན་ཤིན་ཏུ་གཏོང་བར་བྱེད། ལ་ལ་བྱོལ་སོང་གི་སྐྱེ་གནས་ཀྱི་བརྟུལ་ཞུགས་ཀྱིས་ཉིན་མཚན་ཤིན་ཏུ་གཏོང་བར་བྱེད། སྡིག་པ་སྤོང་བ་ཁྱོད་ཀྱིས་གཟུགས་དེ་བཞིན་དུ་དཀའ་ཐུབ་དང་། བརྟུལ་ཞུགས་དང་། ཚངས་པར་སྤྱོད་པ་ལ་གནས་པ་ཕྱོགས་དང་མི་འཐུན་པའི་མྱ་ངན་ལས་མ་འདས་ཤིང་འཕགས་པས་དམོད་གོར་མ་ཆག །​བཙུན་པ་བཅོམ་ལྡན་འདས་དེ་བཞིན་ནོ། །​བཅོམ་ལྡན་འདས་ཀྱིས་བཀའ་སྩལ་པ། སྡིག་པ་སྤོང་བ་ཁྱོད་ཐར་པ་ལ་ཡང་ཕྱོགས་དང་མི་འཐུན་པའི་མྱ་ངན་ལས་འདས་པས་འཕགས་པ་ལ་དམོད་པ་ནི་འདི་ལྟ་སྟེ། དྲི་མས་དྲི་མ་བཀྲུས་པ་དང་། དམར་པོས་དམར་པོ་བཀྲུས་པ་དང་། མུན་པས་མུན་པ་ལ་ཞུགས་པ་དང་། དུག་གིས་དུག་ཟོས་པ་དང་། ཚིག་པས་མེའི་ནང་དུ་བཅུག་པ་དེ་ལྟར་དེ་བཞིན་དུ་ཁྱོད་སྡུག་བསྔལ་མྱ་ངན་ལས་འདའ་བའི་ཐར་པ་ལ་བརྩོན་པས་ཉོན་མོངས་པ་ལས་ཐར་བར་བྱ་བའི་ཕྱིར་ཁྱོད་ཀྱི་གཟུགས་དེ་བཞིན་དུ་མཆོག་ཏུ་དཀའ་བ་སྤྱོད་པ་བདག་ལ་གནོད་པའི་རྗེས་སུ་སྦྱོར་བར་འགྱུར་རོ།