སྤྲིན་ཆེན་པོ།

The Great Cloud (1)
F.143.b

Mahāmegha
F.143.b, volume 64, Degé Kangyur

བར་སྨྲ་བར་ཡང་འགྱུར་རོ། །​དེ་བཞིན་གཤེགས་པའི་རྗེས་སུ་རབ་ཏུ་བྱུང་བའི་སེམས་ཅན་རྣམས་ལ་ནི་ཚུལ་ཁྲིམས་ཉམས་པ་མེད་དོ་ཞེས་ཚུལ་ཁྲིམས་ཀྱི་བསྔགས་པ་བརྗོད་པར་ཡང་འགྱུར་རོ། །​དེ་བཞིན་གཤེགས་པའི་བསྟན་པ་ལ་ནི་ནུབ་པར་འགྱུར་བ་མེད་དོ་ཞེས་ནུབ་པར་མི་འགྱུར་བའི་བསྔགས་པ་བརྗོད་པར་ཡང་འགྱུར་རོ། །​དེ་བཞིན་གཤེགས་པའི་རིགས་དང་རྒྱུད་དག་ཅིང་ཡོངས་སུ་དག་ལ་དྲི་མ་མེད་པས་བྱང་ཆུབ་སེམས་དཔའ་ནི་ཐབས་ཀྱི་རིགས་ཀྱི་རྒྱུད་ཡིན་ནོ་ཞེས་ལྟ་བ་ཕུན་སུམ་ཚོགས་པར་ཡང་འགྱུར་རོ། །​རྟག་ཏུ་འཁོར་བ་ལ་སྡུག་པར་སེམས་པར་ཡང་འགྱུར་རོ། །​འཁོར་བའི་བསྔགས་པ་བརྗོད་པར་ཡང་འགྱུར་རོ། །​འཁོར་བའི་ཆེད་དུ་ཐོས་པའི་རྒྱ་མཚོར་ཡང་འགྱུར་རོ། །​དེ་བཞིན་གཤེགས་པའི་རིགས་ལ་དམིགས་པར་འདོད་པར་ཡང་འགྱུར་རོ། །​རྟག་ཏུ་ཉོན་མོངས་པ་ལ་སེམས་པར་ཡང་འགྱུར་རོ། །​ཉོན་མོངས་པ་ལ་སྡུག་པར་སེམས་པར་ཡང་འགྱུར་རོ། །​ཉོན་མོངས་པའི་སྒོ་རྣམ་པ་སྣ་ཚོགས་འཐོབ་པ་ལ་དད་པ་ཐོབ་པར་ཡང་འགྱུར་རོ། །​སངས་རྒྱས་ཐམས་ཅད་ཀྱི་ཕྲིན་ལས་ཀྱི་ཞིང་ལ་སྨོན་ལམ་འདེབས་པའི་སེམས་སུ་ཡང་འགྱུར་རོ། །​ལས་ཐམས་ཅད་ཀྱི་རྩ་བ་ནི་ཉོན་མོངས་པ་ཡིན་ནོ་ཞེས་རྙེད་པ་ལེགས་པར་རྙེད་པར་ལྟ་བར་ཡང་འགྱུར་རོ། །​སངས་རྒྱས་ཀྱི་རྟག་པ་ཉིད་ལ་ཡང་སོམ་ཉི་མི་ཟ་ཞིང་ཡིད་གཉིས་མེད་ལ་ཐེ་ཙོམ་ཟ་བར་ཡང་མི་འགྱུར་རོ། །​འཁོར་བ་ལ་མངོན་པར་དགའ་བར་ཡང་འགྱུར་རོ། །​འཁོར་བ་ལ་མོས་པར་ཡང་འགྱུར་རོ། །​བདག་སངས་རྒྱས་སུ་འགྱུར་བར་བྱའོ་ཞེས་རྟག་ཏུ་དད་པའི་སེམས་སུ་ཡང་འགྱུར་རོ། །​བདག་གིས་ཆོས་ཀྱི་འཁོར་ལོ་བསྐོར་བར་བྱའོ། །​བདག་གིས་སེམས་ཅན་རྣམས་དགྲོལ་བར་བྱའོ། །​བདག་གིས་སངས་རྒྱས་ཀྱི་གདུང་མི་གཅད་པར་བྱའོ་ཞེས་དམ་འཆའ་ཞིང་སྨོན་ལམ་འདེབས་ཏེ། བྱང་ཆུབ་སེམས་དཔའ་དེད་དཔོན་དུ་ཡང་འགྱུར་རོ། །​བདུད་ཀྱི་སྨན་པར་ཡང་འགྱུར་རོ། །​འཁོར་བའི་ཉོན་མོངས་པའི་རྒྱ་མཚོའི་སྟོན་པ་བོར་ཡང་འགྱུར་རོ། །​འཁོར་བའི་ཉོན་མོངས་པའི་ཚོང་རྡལ་འཐོབ་པར་ལྟ་བར་ཡང་འགྱུར་རོ། །​འཁོར་བའི་རྒྱ་མཚོ་ཆེན་པོ་འཐོབ་པས་སྐོམ་པར་ཡང་འགྱུར་རོ། །​འཁོར་བ་ལ་སྲེད་པར་ཡང་འགྱུར་རོ། །​འཁོར་བ་འཐོབ་པ་ལ་རག་ལས་པའི་སེམས་སུ་ཡང་འགྱུར་རོ། །​འཁོར་བ་འཐོབ་པ་མི་

eKangyur, UT4CZ5369-I1KG9190-0000, page 286 (143b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh232/UT22084-064-002-1525#UT22084-064-002-1525