ཏིང་ངེ་འཛིན་གྱི་རྒྱལ་པོའི་མདོ།

The King of Samādhis Sūtra
F.35.b

Samādhi­rāja­sūtra
F.35.b, volume 55, Degé Kangyur

སྣ་ཚོགས་རྒྱན་མང་དགའ་སྐྱེད་འཐོར་བར་བྱེད། །​བྱང་ཆུབ་སེམས་མཆོག་དཔེ་མེད་བསྐྱེད་ནས་སུ། །​ཁ་ཅིག་ན་བཟའ་རིན་ཆེན་འཐོར་བར་བྱེད། །​ཁ་ཅིག་གསེར་གྱི་དྲ་བ་བཟང་པོ་འཐོར། །​ཁ་ཅིག་སྤེན་ཏོག་རྒྱན་བཟང་འཐོར་བར་བྱེད། །​ལ་ལ་གསེར་གྱི་རྒྱན་ནི་དམ་པ་འཐོར། །​ཁ་ཅིག་དེ་བཞིན་གདུ་བུ་འཐོར་བར་བྱེད། །​ལ་ལ་གདུ་བུ་བཟང་པོ་དེ་འཐོར་ཏེ། །​ཁ་ཅིག་རིན་ཆེན་སྤྲས་པའི་དཔུང་རྒྱན་འཐོར། །​ཁ་ཅིག་བདག་ཅག་སངས་རྒྱས་གྱུར་ཅིག་ཅེས། །​སེམས་བསྐྱེད་གོས་ཕྲན་བཟང་པོ་འཐོར་བར་བྱེད། །​འཇིག་རྟེན་མགོན་པོ་སྒོ་ན་བཞུགས་པའི་ཚེ། །​མི་དག་ཁ་ཅིག་གསེར་གྱི་ཙོང་ཙོང་འཐོར། །​སེམས་དད་གཙུག་གི་ནོར་བུ་མཆོག་ཀྱང་འཐོར། །​ལ་ལ་རིན་ཆེན་དྲ་བ་འཐོར་བར་བྱེད། །​སེམས་ཅན་ཤིན་ཏུ་མི་བཟད་སྡུག་བསྔལ་ཞིང་། །​གཙེ་བ་རྣམ་མང་ཟུག་རྔུས་ཟུག་པ་ཡང་། །​འདྲེན་པ་སྐྱེས་བུ་གཙོ་བོའི་དཔལ་གྱིས་ནི། །​ཐམས་ཅད་བདེ་བ་དང་ཡང་ལྡན་པར་གྱུར། །​ཁུ་བྱུག་དང་ནི་རི་སྐེགས་རྨ་བྱ་དང་། །​དེ་བཞིན་ཁྲུང་ཁྲུང་དང་ནི་མཚོ་བྱ་དང་། །​བྱ་མང་ཀུན་ནི་ནམ་མཁར་འདུག་ནས་སུ། །​ཤིན་ཏུ་ཡིད་འོང་མཆོག་གི་སྒྲ་ཡང་འབྱིན། །​དེ་ཚེ་བྱ་ཚོགས་མང་པོ་རབ་དགའ་བས། །​འཇམ་ཞིང་ཡིད་དུ་འོང་བའི་སྒྲ་ཕྱུང་སྟེ། །​གང་གིས་སྙན་པའི་སྒྲ་སྐད་དེ་ཐོས་པ། །​དེ་དག་འདོད་ཆགས་ཞེ་སྡང་གཏི་མུག་ཞི། །​སེམས་ཅན་བྱེ་བས་དགའ་བའི་སྒྲ་ཐོས་ནས། །​ཐམས་ཅད་རྗེས་སུ་འཐུན་པའི་བཟོད་ཐོབ་སྟེ། །​མ་འོངས་དུས་ན་རྒྱལ་བར་ཁྱེད་འགྱུར་ཞེས། །​དེ་དག་ཀུན་ལ་བདེ་གཤེགས་ལུང་ཡང་སྟོན། །​དེ་ཡི་དུས་ན་ཉོན་མོངས་མི་འབྱུང་སྟེ། །​ཆོས་ཀྱི་རྒྱལ་ལ་ཐམས་ཅད་རི་མོར་བཅས། །​དེ་ཚེ་འདྲེན་པའི་སྐུ་བྱད་མཐོང་ནས་ནི། །​སངས་རྒྱས་ཡེ་ཤེས་མཆོག་ལ་མོས་བསྐྱེད་དེ། །​བདག་ཅག་ནམ་ཞིག་འདི་འདྲའི་མཁྱེན་ཐོབ་སྙམ། །​བསམ་པ་མཁྱེན་ནས་རྒྱལ་བ་ལུང་སྟོན་ཏེ། །​བདེ་བར་གཤེགས་པའི་བ་སྤུ་ཁུང་རེ་ནས། །​འོད་ཟེར་དག་ནི་སྟོང་ཕྲག་བརྒྱ་ཡང་བྱུང་། །​དེ་ལས་ལྷག་པར་གང་གཱའི་བྱེ་སྙེད་དེ། །​དེ་དག་གི་ཡང་མཚན་མ་གཟུང་མི་ནུས། །​དེ་ཚེ་ཉི་མའི་འོད་ཀྱང་མི་སྣང་སྟེ། །​མེ་དང་ནོར་བུ་ལྷ་ཀུན་འོད་ཀྱང་མེད། །​རྒྱལ་བ་གྲོང་གཤེགས་སངས་རྒྱས་རྣམ་མཛེས་པ། །​དེ་ཚེ་འོད་

eKangyur, UT4CZ5369-I1KG9181-0000, page 70 (35b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh127/UT22084-055-001-5902#UT22084-055-001-5902