ཏིང་ངེ་འཛིན་གྱི་རྒྱལ་པོའི་མདོ།

The King of Samādhis Sūtra
F.91.b

Samādhi­rāja­sūtra
F.91.b, volume 55, Degé Kangyur

པ་དང་ཐེ་ཚོམ་རྣམ་པར་འབྱེད་པ་དང་ལྟ་བ་དྲང་པོར་བྱེད་པ་དང་ལམ་ལོག་པ་སྤོང་བ་དང་ལམ་ལ་གནས་པ་དང་མི་འཆི་བའི་སྒོར་གནས་པ་དང་བྱང་ཆུབ་ཏུ་བསྙེན་པ་དང་སེམས་ཅན་ཐམས་ཅད་ལ་སྣང་བར་གྱུར་པ་དང་ངན་འགྲོ་ཐམས་ཅད་ཀྱིས་མི་འཇིགས་པ་སྟེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་མང་དུ་ཐོས་པའི་ཕན་ཡོན་ནོ། །​དེ་ལ་འདི་སྐད་ཅེས་བྱ་སྟེ། ཡང་དག་ཇི་བཞིན་མཁྱེན་པ་ཡི། །​སངས་རྒྱས་དེ་བཞིན་གཤེགས་པ་ཡིས། །​མང་དུ་ཐོས་པའི་ཕན་ཡོན་ནི། །​བཅུ་པོ་འདི་དག་རབ་ཏུ་བཤད། །​ཉོན་མོངས་རྣམ་པར་བྱང་བ་ཡི། །​ཕྱོགས་གཉིས་པོ་ནི་དེས་ཤེས་ཏེ། །​ཀུན་ནས་ཉོན་མོངས་ཡོངས་སྤངས་ནས། །​རྣམ་པར་བྱང་བའི་ལམ་ལ་སྟོན། །​ནེམ་ནུར་རྣམ་འབྱེད་ཡེ་ཤེས་ལྡན། །​ལྟ་བ་དྲང་པོར་རབ་སྲོང་ཞིང་། །​ལོག་པའི་ལམ་ཡང་རྣམ་སྤངས་ཏེ། །​དྲང་པོའི་ལམ་ལ་གནས་པར་བྱེད། །མི་འཆི་སྒོ་ལ་དེ་གནས་ཤིང་། །​བྱང་ཆུབ་ཏུ་ཡང་ཉེ་བར་འགྱུར། །​སེམས་ཅན་ལ་ཡང་སྣང་འགྱུར་ཏེ། །​ངན་སོང་དག་ལ་འཇིགས་པ་མེད། །​ཀུན་ནས་ཉོན་མོངས་ཆོས་མང་རབ་ཤེས་ཤིང་། །​རྣམ་པར་བྱང་བའི་ཕྱོགས་ཀྱང་དེ་བཞིན་ཤེས། །​ཀུན་ནས་ཉོན་མོངས་ཡོངས་སུ་སྤངས་ནས་ནི། །​རྣམ་པར་བྱང་བའི་ཆོས་ཀྱི་མཆོག་ལ་སློབ། །​སྲོག་ཆགས་ཀུན་གྱི་ནེམ་ནུར་རྣམ་འབྱེད་ཅིང་། །​དེ་ཡི་ལྟ་བ་རྟག་ཏུ་དྲང་པོར་འགྱུར། །​དེ་ནི་ལོག་པའི་ལམ་ཡང་རྣམ་སྤངས་ཏེ། །​ཞི་བ་དྲང་པོའི་ལམ་ལ་རྟག་ཏུ་གནས། །​མི་འཆི་ལམ་ལ་ཁོར་མོར་གནས་འགྱུར་ཞིང་། །​དྲི་མེད་བྱང་ཆུབ་ལ་ཡང་ཉེ་བར་འགྱུར། །​སྲོག་ཆགས་མང་པོ་ཀུན་ལའང་སྣང་བར་འགྱུར། །​དེ་ནི་ངན་འགྲོ་དག་ལའང་འཇིགས་པ་མེད། །​གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྦྱིན་པ་ལྷུར་བྱེད་པ། །​གཞན་ལ་ཆོས་ཀྱི་སྦྱིན་པ་སྦྱིན་པར་བྱེད་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། བྱ་བ་མ་ཡིན་པ་རྣམ་པར་སྤོང་བ་དང་། བྱ་བ་ལ་འཇུག་པ་དང་། སྐྱེས་བུ་དམ་པའི་ཆོས་ལ་གནས་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བ་དང་བྱང་ཆུབ་ཀྱི་སྙིང་པོ་ཐོབ་པར་བྱེད་པ་དང་། དངོས་པོ་ཡོངས་སུ་གཏོང་བ་དང་ཉོན་མོངས་པ་ཚར་

eKangyur, UT4CZ5369-I1KG9181-0000, page 182 (91b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh127/UT22084-055-001-6014#UT22084-055-001-6014