ཤེས་ཕྱིན་ཁྲི་པ།

The Transcendent Perfection of Wisdom in Ten Thousand Lines
F.380.b

Daśa­sāhasrikā­prajñā­pāramitā
F.380.b, volume 32, Degé Kangyur

ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཆོས་ཀྱིས་ཕོངས་པར་འགྱུར་བའི་ལས་བྱས་ཤིང་བསགས་པ་དེས་གང་ཟག་དེ་དེ་ལྟར་ཡུན་རིང་པོར་སེམས་ཅན་དམྱལ་བ་རྣམས་སུ་སྡུག་བསྔལ་མྱོང་བར་འགྱུར་བ་དང་། དེ་བཞིན་དུ་ཡུན་རིང་པོར་དུད་འགྲོ་རྣམས་དང་། དེ་བཞིན་དུ་ཡུན་རིང་པོར་གཤིན་རྗེའི་འཇིག་རྟེན་གྱི་སྡུག་བསྔལ་མྱོང་བར་འགྱུར་བས་ཕྱི་མའི་སྐྱེ་བོ་རྣམས་ལ་སྣང་བ་བྱས་པར་འགྱུར་རོ། །​གསོལ་པ། བཙུན་པ་བཅོམ་ལྡན་འདས་ཇི་སྐད་བཀའ་སྩལ་པ་དེ་དེ་ལྟ་ལགས་སོ། །​བཙུན་པ་བཅོམ་ལྡན་འདས་འདི་ནི་རིགས་ཀྱི་བུའམ། རིགས་ཀྱི་བུ་མོ་དཀར་པོའི་རང་བཞིན་ཅན་གྱི་སངས་རྒྱས་ཀྱི་ཆོས་རྣམས་ཀྱི་རྟེན་ལགས་ཏེ། བདག་ཀྱང་ངན་སོང་རྣམས་སུ་འདི་འདྲ་བའི་སྡུག་བསྔལ་ཡུན་རིང་པོར་མྱོང་ན་མི་རུང་ཞེས་དེ་སྲོག་གི་ཕྱིར་ཡང་དམ་པའི་ཆོས་མི་སྤོང་ལགས་སོ། །​དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །​བཙུན་པ་བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་མཁས་པའི་རང་བཞིན་ཅན་ལུས་ཀྱི་ལས་བསྡམས་ཤིང་ངག་གི་ལས་དང་། ཡིད་ཀྱི་ལས་བསྡམས་པས་དམ་པའི་ཆོས་སྤོང་བར་བགྱིད་པ་དང་། དམ་པའི་ཆོས་སུན་པར་བགྱིད་པའི་གང་ཟག་གིས་བསྟན་པ་དེ་ཐོས་ན་བདག་ཀྱང་འདི་འདྲ་བའི་སྡུག་བསྔལ་དག་མྱོང་བར་འགྱུར་ཞིང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་མི་མཐོང་། དམ་པའི་ཆོས་ཀྱང་མི་ཐོས། དེ་བཞིན་གཤེགས་པའི་དགེ་འདུན་ཡང་མི་མཐོང་། དེ་དག་ལ་བསྙེན་བཀུར་བྱེད་པར་ཡང་མི་འགྱུར། སངས་རྒྱས་འབྱུང་བའི་སངས་རྒྱས་ཀྱི་ཞིང་རྣམས་སུ་ཡང་མི་སྐྱེ་ལ། མི་དབུལ་པོར་འགྱུར་བའམ། དམན་པའི་ཁྱིམ་འདི་ལྟ་སྟེ། གདོལ་པའི་ཁྱིམ་རྣམས་སམ། གཡུང་པོའི་ཁྱིམ་རྣམས་སམ། དམུས་ལོང་ངམ། ཞར་བའམ། ཡན་ལག་མ་ཚང་བའི་བར་དུ་གྱུར་ན་མི་རུང་ཞེས་དེ་ལྟ་བུའི་ཚུལ་ཅན་དུ་བགྱིའོ། །​བཙུན་པ་བཅོམ་ལྡན་འདས་ངག་གི་ལས་མི་བཟད་པ་ལ་མངོན་པར་ཞེན་ཏེ་བགྱིས་ཤིང་བསགས་

eKangyur, UT4CZ5369-I1KG9158-0000, page 578 (289b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh11/UT22084-031-002-5506#UT22084-031-002-5506