ཤེས་ཕྱིན་ཁྲི་པ།

The Transcendent Perfection of Wisdom in Ten Thousand Lines
F.103.a

Daśa­sāhasrikā­prajñā­pāramitā
F.103.a, volume 32, Degé Kangyur

འཚལ་བའི་སེམས་ཅན་དེ་དག་ཀྱང་མ་བགྱིས་ཤིང་མངོན་པར་འདུས་མ་བགྱིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་བྱེད་པ་པོ་དམིགས་སུ་མེད་པའི་ཕྱིར། རྣམ་པ་ཐམས་ཅད་མཁྱེན་པ་ཉིད་དེ་མ་བྱས་མངོན་པར་འདུས་མ་བྱས་པའོ། །སེམས་ཅན་དེ་དག་ཀྱང་མ་བྱས་མངོན་པར་འདུས་མ་བྱས་པའོ། །​དེ་ཅིའི་ཕྱིར་ཞེ་ན། རབ་འབྱོར་གཟུགས་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །​དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་མི་བྱེད་མི་འཇིག་མངོན་པར་འདུ་མི་བྱེད་དེ། རབ་འབྱོར་དེ་བཞིན་དུ་བདག་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །​རབ་འབྱོར་དེ་བཞིན་དུ་ཤེས་པ་པོ་དང་། མཐོང་བ་པོའི་བར་དུ་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །​དེ་ཅིའི་ཕྱིར་ཞེ་ན། རབ་འབྱོར་བདག་ལ་སོགས་པ་གཏན་དམིགས་སུ་མེད་པའི་ཕྱིར་རོ། །​རབ་འབྱོར་རྨི་ལམ་ཡང་མི་བྱེད་མི་འཇིག་མངོན་པར་འདུ་མི་བྱེད་དོ། །​དེ་ཅིའི་ཕྱིར་ཞེ་ན། རབ་འབྱོར་རྨི་ལམ་ནི་གཏན་དམིགས་སུ་མེད་པའི་ཕྱིར། དེ་བཞིན་དུ་བྲག་ཅ་དང་། མིག་ཡོར་དང་། སྒྱུ་མ་དང་། སྨིག་རྒྱུ་དང་། སྤྲུལ་པ་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །​དེ་ཅིའི་ཕྱིར་ཞེ་ན། རབ་འབྱོར་འདི་ལྟར་སྤྲུལ་པ་དེ་གཏན་དམིགས་སུ་མེད་པའི་ཕྱིར་རོ། །​རབ་འབྱོར་ནང་སྟོང་པ་ཉིད་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །​དེ་ཅིའི་ཕྱིར་ཞེ་ན། འདི་ལྟར་ནང་སྟོང་པ་ཉིད་དེ་གཏན་དམིགས་སུ་མེད་པའི་ཕྱིར་རོ། །​དེ་བཞིན་དུ་སྦྱར་ཏེ། རབ་འབྱོར་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །​དེ་ཅིའི་ཕྱིར་ཞེ་ན། འདི་ལྟར་དངོས་པོ་མེད་པའི་ངོ་བོ་ཉིད་སྟོང་པ་ཉིད་གཏན་དམིགས་སུ་མེད་པའི་ཕྱིར་རོ། །​དེ་བཞིན་དུ་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དག་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །དེ་ཅིའི་ཕྱིར་ཞེ་ན། རབ་འབྱོར་འདི་ལྟར་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་གཏན་དམིགས་སུ་མེད་པའི་ཕྱིར་རོ། །​རབ་འབྱོར་དེ་བཞིན་ཉིད་ནི་མི་བྱེད་མི་འཇིག་མངོན་པར་འདུ་མི་བྱེད་དོ། །​རབ་འབྱོར་དེ་བཞིན་དུ་མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཆོས་

eKangyur, UT4CZ5369-I1KG9158-0000, page 23 (12a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh11/UT22084-031-002-4951#UT22084-031-002-4951