ཤེས་ཕྱིན་ཁྲི་པ།

The Transcendent Perfection of Wisdom in Ten Thousand Lines
F.53.b

Daśa­sāhasrikā­prajñā­pāramitā
F.53.b, volume 31, Degé Kangyur

མ་རིག་པ་མ་ཞི་བའི་ཚིག་བླ་དགས་བྱང་ཆུབ་སེམས་དཔར་འགྱུར་བ་ལྟ་ག་ལ་མཆིས། རྒ་ཤིའི་བར་དུ་ཡང་དེ་བཞིན་དུ་སྦྱར་བར་བགྱིའོ། །​བཙུན་པ་བཅོམ་ལྡན་འདས་མ་རིག་པ་དབེན་ཞེས་བགྱི་བ་གཏན་མི་དམིགས་ལགས་ན། མ་རིག་པ་མི་དབེན་པའི་ཚིག་བླ་དགས་བྱང་ཆུབ་སེམས་དཔར་འགྱུར་བ་ལྟ་ག་ལ་མཆིས། རྒ་ཤིའི་བར་དུ་ཡང་དེ་བཞིན་དུ་སྦྱར་བར་བགྱིའོ། །​བཙུན་པ་བཅོམ་ལྡན་འདས་མ་རིག་པ་ཀུན་ནས་ཉོན་མོངས་ཞེས་བགྱི་བ་གཏན་མི་དམིགས་ལགས་ན། མ་རིག་པ་རྣམ་པར་བྱང་བའི་ཚིག་བླ་དགས་བྱང་ཆུབ་སེམས་དཔར་འགྱུར་བ་ལྟ་ག་ལ་མཆིས། རྒ་ཤིའི་བར་དུ་ཡང་དེ་བཞིན་དུ་སྦྱར་བར་བགྱིའོ། །​བཙུན་པ་བཅོམ་ལྡན་འདས་མ་རིག་པ་སྐྱེ་ཞེས་བགྱི་བ་གཏན་མི་དམིགས་ལགས་ན། མ་རིག་པ་འགག་པའི་ཚིག་བླ་དགས་བྱང་ཆུབ་སེམས་དཔར་འགྱུར་བ་ལྟ་ག་ལ་མཆིས། རྒ་ཤིའི་བར་དུ་ཡང་དེ་བཞིན་དུ་སྦྱར་བར་བགྱིའོ། །​བཙུན་པ་བཅོམ་ལྡན་འདས་མ་རིག་པ་དངོས་པོ་མཆིས་ཞེས་བགྱི་བ་གཏན་མི་དམིགས་ལགས་ན། མ་རིག་པ་དངོས་པོ་མ་མཆིས་པའི་ཚིག་བླ་དགས་བྱང་ཆུབ་སེམས་དཔར་འགྱུར་བ་ལྟ་ག་ལ་མཆིས། རྒ་ཤིའི་བར་དུ་ཡང་དེ་བཞིན་དུ་སྦྱར་བར་བགྱི་སྟེ། ཕུང་པོའི་སྐབས་སུ་ཇི་སྐད་བསྟན་པ་བཞིན་དུ་ཐམས་ཅད་རྒྱ་ཆེར་སྦྱར་བར་བགྱིའོ། །​བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་ལེགས་སོ་ལེགས་སོ། །​བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པས། གཟུགས་ཀྱི་ཚིག་བླ་དགས་མི་དམིགས། དེ་བཞིན་དུ་སྦྱར་ཏེ། གཟུགས་དངོས་པོ་མེད་པའི་བར་གྱི་ཚིག་བླ་དགས་མི་དམིགས། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་ཚིག་བླ་དགས་མི་དམིགས་པ་ནས་དེ་བཞིན་དུ་སྦྱར་ཏེ། རྣམ་པར་ཤེས་པའི་དངོས་པོ་མེད་པའི་བར་གྱི་ཚིག་བླ་དགས་མི་དམིགས། དེ་བཞིན་དུ་སྦྱར་ཏེ། མ་རིག་པའི་བར་གྱི་ཚིག་བླ་དགས་མི་དམིགས་ཤིང་། རྒ་ཤིའི་བར་གྱི་ཚིག་བླ་དགས་མི་དམིགས་པ་ནས། དངོས་པོ་མེད་པའི་བར་གྱི་ཚིག་བླ་དགས་མི་དམིགས་པར་ཕུང་པོའི་སྐབས་སུ་ཇི་སྐད་བསྟན་པ་དེ་བཞིན་དུ་སྦྱར་བར་བྱ་སྟེ། དེ་ལྟར་ཤེས་རབ་ཀྱི་ཕ་རོལ་ཏུ་

eKangyur, UT4CZ5369-I1KG9157-0000, page 518 (53b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh11/UT22084-031-002-4853#UT22084-031-002-4853